Курс валют
$
63.72
0.01
70.5
Курс валют
Курс валют
$
63.72
0.01
70.5
Меню
Поиск по сайту

Хаппытаал былааһа кыраны-кыамматы аһыммат

12.11.2019 08:18 3
Хаппытаал былааһа кыраны-кыамматы аһыммат

Кэбээйигэ атырдьах ыйын 30-гар буолбут сөмөлүөт саахала боростой тыа дьонун олоҕун биирдэ түҥнэри сүргэйэн кэбистэ.  Үс ый былаһын тухары силиэстийэ барара да, барбата да биллибэт. Сүтүктээхтэр өрөспүүбүлүкэ муҥур тойонугар көмө көрдөөн сурук суруйбуттара даҕаны, туһа тахсыа суох быһыылаах.

Өлбүт өлбүтүнэн буолаахтаатаҕа. Оттон тыыннаах хаалбыт, саахалтан кэлиэкэ буолбут дьон иннилэрин-кэннилэрин бэйэлэрэ дьаһанан көрөөхтүүллэригэр тиийэллэр. Хапсыгыр хармааннаах хаппытаал үйэтигэр кырдьыгын ирдэһэн булбат үйэтэ кэллэ.

Aartyk Дьокуускай-Суордаах хайысханан атырдьах ыйын 30-гар көтөн испит Ан-2 саахалын туһунан хас да ыстатыйа суруйда. Буруйдаах урбаанньыт Сергей Кривошапкин күн-түүн тупса турар курдук, оттон кини сөмөлүөтэ эчэппит дьоно тыын былдьаһыгар быраҕылыннылар.

Старостиннар уонна Винокуровтар дьиэ кэргэттэрэ күн күбэй ийэлэрин сиргэ-буорга кистээтилэр. Саахалга Старостиннар дьиэ кэргэттэрэ ийэлэрэ эрэ буолбакка инбэлиит уоллара уонна кырдьаҕас эбэлэрэ эмиэ түбэһэн улаханнык эчэйэн сыталлар. Сис тоноҕоһо, ойоҕос тостуута, үөс-ис доргуйуута баһаам. Ыал аҕата  Иван Егорович барар сирим баҕана үүтэ, кэлэр сирим кэлии үүтэ буолла диэн баһын хам туттаахтыыр. Инбэлиит уолун көрөр-истэр киһитэ суох буолан үлэтиттэн уурайарга күһэллибит.

Старостиннар ийэлэрэ тыыннааҕар Дьокуускай куоракка ипотеканан квартира ылбыттар эбит. Онно ыарыһах уолун илдьэ Иван Егорович — эмкэ-томко уонна тапталлаах ийэлэрин суорума суоллаабыт быһылаан силиэстийэтин хаамыытын билсээри — Дьокуускайга кэлбит. Силиэдэбэтэл «сарсыҥҥыттан» уратыны эппэт, баччааҥҥа диэри көрсө иликпин диэн кини муҥатыйар.

Иван Старостин ипотекатын кыайан төлүүр кыаҕа суох буолан, бааннартан каникул ыла сатаабыт даҕаны — аккаастаабыттар. Эргиччи эрэйгэ тэбиллибит эр киһи ким эмэ көмө буолаарай диэн онно-манна үҥэн-сүктэн, көрдөһөн, ааттаһан көрбүт даҕаны кыһалҕалаах дьон туһугар аан барыта сабыылаах буолбут, барытыттан мэлийбит.  «Чааһынай хампаанньа сөмөлүөтүн саахалыгар түбэспиккит, ол дьонтон баран көмөтө көрдөөҥ», — диэн былаас уоргаттара бэйэ-бэйэлэригэр тэбиэлэһэн кэбиспиттэр.

Арассыыйаҕа сөмөлүөт саахала буоллаҕына судаарыстыба эчэйбиттэргэ, сүтүктээхтэргэ көмө оҥорор үгэстээх. Чааһынай, судаарыстыбаннай  хампаанньа диэн араастаабат, билигин судаарыстыбаннай да хампаанньа хаалбата. Оттон биһиги өрөспүүбүлүкэбит былааһа  тыа ыала алдьархайга түбэспитигэр аантан антах атаарара өйдөммөт. Сатахха, ол буруйдаах урбаанньыты ыга үктээн сорудахтыах да этэ. Ама билбэт-көрбөт, билсибэт киһилэрэ буоллаҕай.  Пиарга, аһааһыҥҥа-сиэһиҥҥэ, күүлэйгэ. көргө-нарга харчы хамсыыр, оттон дьиҥнээхтик дьону абырыырга тоҕо соххор солкуобай көстүбэтий?!

Социальнай хайысханы салайар  правительство бэрэстээтэлин солбуйааччы Ольга Балабкинаҕа Старостиннар тустарынан кэпсээтибит. Кини кыаммакка, атаҕастаммыкка көмөлөһөр үлэтин сүрүн эбээһинэһэ буоллаҕа эбээт. Илдьити, суругу тиэртибит эрээри хотун дьэ хайдах сыһыаннаһар…

Иван Егорович Старостин СӨ Ил Дарханыгар  Айсен Сергеевич Николаевка Аһаҕас суругун бэчээттиибит. Сурук балаҕан ыйыгар суруллубут.

«Бу дьыл атырдьах ыйын 30 күнүгэр биһиги дьиэ кэргэҥҥэ күүтүллүбэтэх өттүнэн алдьархай буолла. Дьокуускай-Суордаах маршрутунан көтөн испит Ан-2 сөмөлүөт саахалыгар тапталлаах кэргэним, икки оҕо ийэтэ Татьяна Васильевна Старостина сырдык тыына быһынна.

Күн бүгүн алдьархай буолбут сиригэр силиэстийэлии бара иликтэр. Онно көтөргө 1,5 мөл. солк. наада дииллэр. Аны туран, бу АН-2 сөмөлүөт хаһаайына Сергей Иннокентьевич Кривошапкин диэн урбаанньыт эбит. Онон чааһынай тэрилтэни хонтуруоллаабаппыт диэн ханнык да быһаарыыны биэрбэтилэр.

Саахал буолбутуттан ый ааста. Сотору хаар, тымныы түһэн, хайа эниэтигэр экспертиза ыытыллара да уустук буолуо. Арааһа, ону кэтэһэллэр дуу? Ол сөмөлүөтү кытта дьон туттарбыт таһаҕастара оннук сыттаҕа, ким да эппиэттээбэт.

Бу чааһынай тэрилтэлээх дьон Дьааҥы Суордааҕар эмискэ ким дьаһалынан көппүттэрин билиҥҥэ диэри өйдүү иликпит. Суордаах порда сабыллыбыта уонтан тахса сыл буолла.

Онон бу хаһыат нөҥүө өрөспүүбүлүкэбит баһылыга Айсен Николаевтан бу иэдээн ис дьиҥин быһаарарга, силиэстийэ ыытыллан, икки киһи өлүүлээх саахалга буруйдаах дьон эппиэккэ тардыллалларыгар көмөлөһөргүтүгэр көрдөһөбүт.

Сүтүктээх Старостиннар дьиэ кэргэттэрэ«.

***

Aartyk.Ru

Обсуждение • 3

Добавить комментарий
  1. 215

    барытын сабан, дьону улэлэриттэн уьулан, сордоон агай эрэллэр.

  2. да-а

    дьааны улуусун дьасалтата бисиэхэ комо кордоон сайабылыанньа суруйбатага, билбэппит дии олороллор усу. дьинэ, бэйэлэрэ да тахсан, булан маннык суруйун, инник гынык, баччаны эрэ, кыра да буоллар комо онорор кыахтаахпыт диэн кыратык тубугурэ да тусуо эбиттэр. дьинэ бюджеттарыгар кыамматарга сусал материальнай комо диэн кыра да согус буоллар ыстатыйалаахтар. дьэ сурдээхтик хамсаабат, ымыттыбат дьасалта-былаас кэлбит эбит дьааныга диэн согобут. хата тойоттор- басылыктара бэйэлэрэ согуруунан — омук сиринэн сылдьар, барбыт- кэлбит сурахтара исиллэр усу

  3. уйбаан

    ха, оччого кыраны -кыамматы асыммат хапытаал былааса бутэсиктээхтик ханна туругурбутуй ? дьааныга эрэ дуу, ил дарханнаах ороспуубулугэгэ бутуннуу дуу ?

Оставить комментарий