Ксения ВИНОКУРОВА, сөмөлүөт саахалыгар суорума суолламмыт Арина Винокурова ийэтэ: “Сирдээҕи сууттааҕар Таҥара суута ыар буолуоҕа”

Aartyk.Ru  телеграм-каналга (@Aartykru) 2019 сыллаахха атырдьах ыйын 30 күнүгэр тахсыбыт АН-2 сөмөлүөт саахалыгар былаҕайга былдьаппыт Арина Винокурова ийэтэ Ксения Васильевна Винокурова суруйда:

–  Дорообо, Леверьев 4 поселение дэриэбинэҕэ сынньанар, Кривошапкин биирдэ да суукка сылдьыбатаҕа, сууд, прокуратура кини диэкилэр, бырастыы гынын да диэбэтэҕэ, барыта Кини сымыйата дакаастаммыта да ол сымыйатыгар да эппиэккэ тардыллыбыта, за ложные показания, биһигини сирдээги суут тэпсибитэ. Сирдээҕи суут итинник, ол гынан баран Таҥара суута ыарахан буолуо, таһаарын.

Санатар эбит буоллахха, Aartyk.Ru бу ыарахан түбэлтэ туһунан хас да ыстатыйа суруйан таһаарбыта. 2019 сыллаахха Дьокуускайтан Суордаахха диэри (Үөһээ Дьааҥы улууһа) коммерческэй рейс АН-2 сөмөлүөтүнэн көтөн иһэн хайа сирэйигэр кынатынан охсуллан сууллан түспүтэ. Сонно икки киһи – Арина Винокурова, Дьокуускайга олорор тиис бырааһа, уонна Татьяна Старостина диэн Суордаах оскуолатын учуутала барахсаттар суорума суолламмыттара.  Ону таһынан Татьяна инбэлиит уола, кини ийэтэ улаханнык эмсэҕэлээбиттэрэ, суорҕан-тэллэх дьоно буолаахтаабыттара.

Ол алдьархайтан сылтаан уонна кырдьыгын кыайан булбакка, ыал аҕата Иван Старостин бэйэтигэр тиийинэн өлөн хаалбыта. Ол иннинэ Иван Старостин хаста да Aartyk.Ru интернет-сайтка интервью, информация биэрбитэ. “Олох сытыбыйбыт систиэмэ, кыра-хара киһи кырдьыгын булбат үйэтэ үүммүт, дьокуускайдар бары атыыламмыттар”, – диэн кэлэйбитэ. Кэлин сэтинньи 16 күнүгэр: “Понед. котуу былаанна турар диэтэ следователь но эмиэ погодаттан тутулуктаах диир”, – диэн тиһэх СМС ыыппыта баар.

Сөмөлүөт хаһаайына Сергей Кривошапкин диэн улахан кыахтаах бизнесмен киһи буоларын бары да билэр этилэр. Кини урут Михаил Николаев саҕана Өлөөн улууһугар баһылыгынан үлэлии сылдьан бэрт бөрүкүтэ суох балаһыанньаҕа түбэһэн дуоһунаһыттан уурайбыта. Билэр дьон кэпсииринэн, Өлөөн баһылыга тойоттору вертолетка тийэ сылдьан кыыл табалары бултатара үһү. Ол сылдьан табаны кыдьыктаахтык кырган тутуллан, сэмэлэнэн үлэтиттэн холдьоҕуллубут. Ол кэннэ бэйэтин бастакы идэтинэн (хирург быраас) чааһынай клиника аһан үлэлэппит, сырыһыннара сөмөлүөттэри атыылаһан таһаҕас таһар өҥөнү тэрийбит.

Сөмөлүөт саахалын кэнниттэн тута силиэстийэ барбатаҕа. Эһиилигэр кулун тутарга биирдэ ыытыллыбыта. Эрдэ Иван Старостин хаста да Дьокуускайга кэлэн Следственнэй кэмитиэт управлениетын аанын тоҥсуйа сылдьыбыта да, “халлаан куһаҕан, вертолет көтөр кыаҕа суох” диэн үтүмэн аккаас тутан иһэрэ. Онтон улаханнык хараастара, санаата оонньуура: “Билигин хаар-самыыр суолу-ииһи сайҕыаҕа, саас тугу булан ылаллар үһү. Кривошапкин бэлиэр тиийэн суолун сотуннаҕа”, – диэн ыксыыра. Сол курдук сааһыгар тиийбэккэ, кэргэнин батыһан анараа дойдулаахтаабыта. Билигин инбэлиит уолун, ийэ кыннын ким көрөрө буолла, хайдах-туох олороохтууллар… Улуус баһылыга Чириковтан ыйытан көрбүтү ууну омурдубута.

Коллегалара этэллэринэн, Кривошапкин сөмөлүөттэрэ пассажирдары таһар бырааба суох уоран коммерческэй рейс оҥоро сылдьыбыттар. Быһылаан кэнниттэн икки сыл буолан баран кэмниэ-кэнэҕэс силиэстийэ бүтэн суут буолбута. Пандемия кэмигэр түбэһэн, тустаахтартан ураты, кими да суукка чугаһаппатахтара. Ксения Васильевна Винокурова абатыттан ити суруйдаҕа: “Сирдээҕи суут тэпсибитэ, Таҥара суута иэстэһиэ”, – диэн. Кривошапкин биирдэ да суукка сылдьыбытах, буруйдаах “докумуона суох көтө сылдьыбыт” летчик буолбут уонна 4 сылга көс хаайыытыгар ууруллубут.  Онон бүттэ… Инньэ үс киһи олоҕо, бүтүн ыал огдолуйуута “сирдээҕи сууту” ымытыннарбатах. Ол кэнниттэн ким суукка-сокуоҥҥа итэҕэйиэй…

Сатахха икки ыал тулаайах хаалбыт оҕолоругар буруйдаахтартан туох да төлөбүр ууруллубатах. “Похоронаҕа Кривошакпин көмөлөстө быһыылаах этэ, сиэммэр ол күһүн телефон биэрбитэ”, – диэн Ксения Васильевна этэр. Оттон Арина коллегалара “Кривошапкин похоронаҕа бараабыт сууммам бу диэн счет туруорбута”, – диэн кэпсииллэр.

***

Туйаара НУТЧИНА,

Aartyk.Ru