Юрий Куприянов: «Биир дойдулаахтарым итэҕэллэрэ – олоҕум саамай үрдүкү чыпчаала»

Ытыктабыллаах биир дойдулаахтарым!
Бу ааспыт барыллаан быыбардар кэмнэригэр биһиги, мэҥэлэр, биир сыалга-сорукка түмүстүбүт. Билигин күүспэр күүс эбиллэн, санаам күүһүрэн, эһигинниин бииргэ олохпут хаамыытын ситимнииргэ, ситиһиилэргэ дьулуһарга кыахтаах буоллум.

Дойдум дьоно, бу быыбардарга көхтөөхтүк кэлэн кыттыбыккытыгар, санааҕытын эппиккитигэр олус махтанабын. Хас биирдии куолас – улууспут сайдыытыгар сүҥкэн суолталаах кылаат.
Бу барыллаан куоластааһыны дьоһуннаахтык ааһыыбыт – эппиэтинэс, үтүө эппиэтинэс буолар.
Көрсүһүүлэргэ, кэпсэтиилэргэ элбэх этилиннэ. Онтон биири чорботон бэлиэтиэхпин баҕарабын. Аҕа саастаах биир дойдулаахтарбын кытта атах тэпсэн олорон сэһэргэһиибэр, ытыктыыр дьонум: “Уолбут Юрий, ханна да сырыттаргын дьонуҥ санаатын иһит, норуоккар чугас буол”, – диэн эппиттэрэ. Бу, кырдьык, быһаарар күүс буолар, бэйэ-бэйэни истиһэн, биир олоҕунан олоруу – барыбыт аналбыт.

Биһигини, мэҥэлэри, туох түмэрий?
Олохпут хаачыстыбата үрдүк таһымнаах буоларыгар дьулуһабыт. Ол аата айылҕабытын харыстыыбыт, түөлбэлээн олорор сирбитин-уоппутун чөл тутабыт, хас биирдиибит үлэлээх буолан, дохуот аахсабыт. Маны сэргэ суол, тыа хаһаайыстыбатын оҥорон таһаарыытын бородууксуйатын батарыы боппуруостара олус суолталаахтар. Биһигини үгүс боппуруос түмэр. Саамай сүрүнэ, биһиги мэҥэлэр холобур буолан, Саха сирин бүттүүн сайдыытыгар дьулуһабыт, өрүүтүн үрдүккэ, инникигэ күүскэ талаһабыт. Түмсүү – биһиги күүспүт. Бу барыта кэскилбитигэр ананар. Онтон оҕолорбут инникилэрин түстээччилэр биһиги көлүөнэ буолабыт.
Биир дойдулаахтарбар өссө төгүл махтанабын! Эһиги итэҕэлгит – олоҕум саамай үрдүкү чыпчаала!

***

Юрий КУПРИЯНОВ,

Москваҕа РФ Президенигэр Саха Өрөспүүбүлүкэтин бастайааннай бэрэстэбиитэлэ, “Биир ньыгыл Арассыыйа” баартыйа барыллаан куоластааһын кыттыылааҕа.