ДОЛГУННАР (Борис ПАВЛОВ хоһооно)

Күлүмүрдэс иэннээх 

Күндү эбэм Өлүөнэ, 

Эйигин үөһэттэн өҥөйөн турабын, 

       тохтоло суох сундулуйа устар устар 

                           сырдык-ыраас сүүрүккүн  

Тонолуппакка одуулуу көрөбүн… 

Туох сураҕы илдьэ иһэллэрий 

        тохтоло суох устар эрэһэ 

                          хара долгуннарыҥ? 

Тугу кэпсииллэрий уос номоҕо 

                        буолбут үһүйээннэриҥ? 

Туох диэн алгыылларый,  

                         өрүһүлтэ буолбут өбүгэлэр, 

Таайыллыбатах урууна суруктар, 

Үс куттан үөскээн тахсар  

                                 дьикти сурахтар? 

Арай сүүрүгүҥ санаарҕаабыт 

             саха дьахтара санныгар ыспыт  

                         уһун хара баттаҕын курдук 

       аллараа саккырыыр,  

Эргэ тахсан эрэр кэрэ кыыс 

                                   суһуоҕун курдук 

       өрүллэ, өрүллэ тус хоту субуллар… 

Долгуннар өрүһүспүтүү үтүрүһэ-үтүрүһэ 

      үйэлэр таайыллыбатах  

             таабырыннарын хотугу муустаах 

           модьоҕоҕо илдьэн тимирдэллэр, 

Санаалар, ырыалар, ыралар 

             туос оҥочоҕо олорон 

                       иннилэрин хоту эрдэллэр. 

Бу үйэ айана. 

Норуот айана… 

Баҕа санаата… 

Сындалҕаннаах сырата… 

Биллибэт кэмнэртэн саҕаламмыт дьылҕа. 

Сах саҕаттан саҕыллыбыт саха, 

Оттуллубут бастакы уот, 

Аан дойдуну сабардаабыт улуу Айылҕа! 

Ким этигиний эн? 

Тумат? Хара саҕыл? 

Тигиилээх сирэйдээх? 

Байаҕантай? 

Дьохсоҕон? 

Буор балаҕаннаах Бороҕон? 

Көс олохтоох Солоҕон? 

 Эбэтэр эн кистэлэҥ

           кэпсээниҥ

Тыал буолбуттары кытта муора 

туманыгар киирэн эргиллибэттии 

        сүппүтэ дуу? 

Эбэтэр эн ыра санааҥ 

     үрүҥ сылгы үөрүн курдук 

        үрэх баһыгар адьырҕа бөрө үөрүттэн 

үргэн куоппута дуу?  

ЭБЭ… 

ИЙЭ… 

 Муммут оҕону иитиэхтээн таһаарбыт 

           үүттээх эмиий… 

УБАЙ.. 

БЫРААТ… 

ЭДЬИИЙ… 

Үөһэттэн ыйаахтаах дьылҕаҕар 

           эрэниий! 

Эстибит биис бүтэһик кэскилин 

     сылаас хоонньугар өстөөхтөртөн 

                         саһыарбыт сур бөрө.. 

Өлөн эрэр боотурга  

               өрүһүлтэ буолбут 

       халлааҥҥа  халаахтыыр хара суор. 

Окко түспүт оҥоһуу, 

Сиргэ түспүт сэрэбиэй… 

Ийэ5ин эн биһиэхэ. 

Эбэҕин… 

Сүгүрүйэбин эйиэхэ Саха сирэ! 

Улуу эбэм Өлүөнэ! 

Туоххун барытын биһиэхэ биэрэҕин… 

Саха сирин тамаҕын ханнараҕын, 

Аҕыс аймаҕы аһатаҕын, 

Тоҕус ууһу тотороҕун… 

Сарсыарда тахсар саһарҕаттан 

     күн курдук  күлүмүрдүү  

                                  оонньуугун, 

Киэһэ толбоннураҕын, 

Күлүмүрдэс үрүҥ көмүс 

                      долгуннанаҕын, 

Тайахха үөмэр булчут 

                              курдук чуумпураҕын, 

саарба суолун чуҥнуур 

       булчут курдук иһийэҕин… 

Уһун айаҥҥа илистибит сылгы курдук сурдургуу тыынаҕын…

Тиһэх чааһыгар улуу кистэлэҥи 

      арыйбатах тоҥус кырдьаҕаһын курдук 

            тыйыс көрүҥнэнэҕин…  

Кутаа иннигэр дьэс хамсалаах 

       олорор дьүкээбил оҕонньорун курдук 

         дьоллоох дьоро быһыыланаҕын… 

Биир ууга иккистээн киирбэккин. 

Биир сүүрүккэ саҥаттан  

                              оҕустарбаккын. 

Мин бэйэм долгуммар киирэбин, 

Көлүөнэм дьылҕатыгар. 

Бу үтүө дойдуга дьоллоохтук 

        олоруохпун баҕарабын. 

Бар дьоммор көмөлөһүөхпүн. 

Эбэбэр сүгүрүйүөхпүн. 

Айыыларбын аһатыахпын. 

Дойдубун кытта бииргэ сайдыахпын. 

 ***

 Борис ПАВЛОВ-КЭМ

Светлана Иннокентьева уруһуйа