Праймериз: Луцкан хотторбут, Кондратьев кыайбыт

Өрөбүл күн хас да сиргэ “ЕР” иһинээҕи быыбар – праймериз буолла. Бу партия иһинээҕи быыбарга кыайбыт кандидаттар аны күһүн балаҕан ыйыгар “ЕР” аатыттан дьиҥнээх быыбарга кыттыахтаахтар.

Аллараа Халыма улууһун баһылыгар праймеризкэ Яков Гаврильевич Елисеев кыайбыт – 471 куолас. Елисеев 1982 сыллаах  төрүөх, “СӨ Олох-дьаһах коммунальнай хаһаайыстыбата” ГУТ отделын начальнига, партия чилиэнэ.

Аллайыахаҕа Валерий Михайлович Сентяков кыайбыт – 501 куолас. “ЕР” өйөөччү, 1980 с.т., “Валеон” ХЭТ генеральнай дириэктэрэ.

Өлүөхүмэ улууһун баһылыгар аны күһүн “ЕР” аатыттан Эдуард Кондратьев киирсэр буолбут – 1475 куолас, утарылаһааччыта Оксана Саввинова – 1194. Кондратьев “Бэс чагда” оҕо лааҕырын дириэктэрин солбуйааччыта, соторутааҕыта диэри үөрэх миниистирин бастакы солбуйааччытынан үлэлии сылдьыбыта. Онтон ууратыллан баран лааҕырга үлэлиир.

Саввинова иккис болдьоҕун Улахан Муҥку баһылыгынан талыллан үлэлии сылдьар, үөрэҕинэн учуутал. Саввинованы саха нэһилиэктэрэ өйөөбүттэр, Кондратьевы – Өлүөхүмэ куората.

Жатай баһылыгар түөрт кандидат праймеризкэ кытынна. Урукку миниистир солбуйааччыта Иван Луцкан кыайтарбыт. Владислав Гладышев хоппут. Гладышев билиҥҥи баһылык солбуйааччыта.

***

Aartyk.Ru