Казаахтарга бокуонньугу атаарыы

Aartyk.Ru суруналыыһа Анжелика Мотосова билигин Казахстаҥҥа баар. Олохтоох норуот туһунан туох сэргэх сонун баарын биһиэхэ суруйан ыытар.

Бииргэ үлэлиир Анар диэн кэллиэгэ кыыһым ийэтэ суох буолбута биир сылын бэлиэтиир түбүгэр сылдьар.

Кэпсиириттэн иһиттэххэ хайдах эрэ бырааһынньыкка бэлэмнэнэр курдук.

«Швейцарияҕа бииргэ үөрэммит оҕолорум кэлиэх буоллулар, дьүһүммүн-бодобун өрө тардыныам, саҥа таҥас ылыныам этэ,” – диирин сөҕө истэбин.

Бу тирээн кэлбитигэр аны миигин эмиэ ыҥыран соһутта. Сөҕөн хос-хос ыйыттым, миигин эмиэ ыҥыраҕын дуо диэн. Ону атын Бахыт диэн кэллиэгэм истэн сэрэттэ:

“Ыҥырыллыбыт киһи булгуччу кэлиэхтээх, былаатта баанан кэлээр» – диэн буолла.

Мин улахан толкуйга түстүм. Биһиэхэ сахаларга өлбүт киһи тэрээһинигэр бокуонньугу тыыннааҕар билсибит-алтыспыт эрэ киһи сылдьар, онтон кинилэргэ өлбүттээх чугас дьоно бэйэлэрэ билсэр-көрсөр, убаастыыр дьоннорун ыҥыраллар эбит. Испэр хайдах эрэ аньыырҕыах санаа киирэн ылар, ол быыһыгар эмиэ да, суруналыыс быһыытынан, интэриэс баар. Онон дьэ барарга сананным.

Болдьохтоох 12 чааспар эрэстэрээҥҥэ хойутаабакка тиийдим. Былааппын баанным, ол эрээри атын омукпун чопчулаан сахалыы үрүҥ көмүс ытарҕа уонна кыра колье кэттим. Кырдьык, дьахталлар бары былааттаахтар. Улахан саала иһигэр остуоллары икки гына араара кэккэлэппиттэр. Эр дьон уонна дьахталлар тус-туспа олороллор эбит.

Кэлбит ыалдьыттары остуолга ыҥырдылар, аһыах иннинэ мэлииппэ аахтылар, икки ытыспытын холбоон илиибитин иннибитигэр тутан олоробут. Мин барытын түһэрсэн иһэбин, мэлииппэ кэннэ илиилэрин арааран сирэйдэрин имэринэр курдук гыннылар. Мин ону хайдах эрэ сатаабатым  да буоллар бу атын омук дьахтара олорор диэн кэллиэгэлэрбиттэн ураты биир да киһи таайбат. Бэл, омос көрдөххө сахалыы киэргэлим кинилэр гиэннэриттэн соччо уратыта суох эбит.

Улахан экраҥҥа хаартыскаларынан видео оҥорон бокуонньук сирдээҕи олоҕуттан сырдаттылар, барыта казаахтыы тылынан. Олоҕун улахан омурҕана сэбиэскэй кэмҥэ ааспыт буолан киһи таайан да өйдүүр.

Тыл этии буолла. Бастаан эр дьон этэр эбит, кинилэр этэн бүппүттэрин кэннэ дьахталлар этэллэр. Эмиэ оттон биһиги курдук өлбүттээҕи санаан ытаан да, күлэн да ылаллар. Бииргэ төрөөбүт быраата эдьиийэ бокуонньук туһунан кинигэ суруйан таһаартарбытын ыалдьыттарга барыларыгар түҥэттилэр.

Ас чааһын кэпсээтэххэ, арыгы диэн аһыы аһы инник тэрээһиннэргэ испэт эбиттэр. Улахан мас бүлүүдэҕэ остуол аайы хоточчу сылгы этэ түҥэттилэр, сымнаҕаһа, минньигэһэ дьикти. Биэ кымыһа пиялаҕар кутуллан турар, истэҕиҥ аайы официаннар кутан биэрэллэр. Кымыстара хайдах эрэ буруо амтаннаах курдук, оттон биэ кымыһын кыра сылдьан эрэ боруобалаабыт буолан биһиэнэ хайдах амтаннааҕын өйдөөбөт эбиппин. Атын ас арааһа баар, биһиэхэ майгынныылларын эрэ суруйдум.

Хас биирдии ыалдьыт олорор сиригэр эрдэттэн пакеттар ууруллубут этилэр, аһааһын бүтэрин диэки пластиковай  иһиттэри түҥэппиттэрэ, ордубут аһы илдьэ барар эбиккин. Бу тэрээһиммит нууччалыыта “поминальный обед” диэн эбит, аһара өр буолбатаҕа, син сөп соҕустук барар эбит.

***

Анжелика МОТОСОВА,

Aartyk.Ru