Курс валют
$
73.01
0.28
85.68
0.48
Курс валют
Курс валют
$
73.01
0.28
85.68
0.48
Меню
Поиск по сайту

Иннокентий ВАСИЛЬЕВ: “АЛРОСА-Нюрба” акциятын атыытыттан Ньурба улууһугар 2,3 млрд бэриллиэхтээх

25.07.2018 13:21 3
Иннокентий ВАСИЛЬЕВ: “АЛРОСА-Нюрба” акциятын атыытыттан Ньурба улууһугар 2,3 млрд бэриллиэхтээх

Кэнники икки сылга улаханнык долгуйбут боппуруоспут түмүктэннэ: «АЛРОСА-Нюрба» ПАО 10% акцията атыыланна. Атыылаһааччы — улахан “АЛРОСА”, атыылааччы — Саха сирин правительствотын тэрилтэтэ «РИК Плюс» АО. Акция 12 млрд солкуобайга атыыланна.

Инньэ гынан, «АЛРОСА» хампаанньа самалык тэрилтэтигэр ирээтин 97,48%-ҥҥа диэри улаатыннарда диэн буолла.

“АЛРОСА-Нюрба” ПАО, аата да кэрэһэлииринэн, Ньурба улууһун сиригэр-уотугар сүрүн үлэтин ыытар. Ити 10% акцияны ньурбалар “бэйэбит киэнэ” диэн улаханнык турууласпыт туруулаһыылара. Ол гынан баран, мөккүөр уопсай түмүккэ кэлбэккэ эрэ “ньурбалар акциялара” атыыга барда.

Ил Түмэн депутаттара “АЛРОСА-Нюрба” ПАО акциятын атыылыыр туһунан кэпсэтии тахсыбытыгар бэйэлэрин санааларын этэ-тыына сатаабыттара. Ким эрэ “атыыга бардын”, ким эрэ “атыыламмата ордук” диэн мөккүөрдээх этилэр. Билигин атыы-тутуу кэнниттэн ким-туох санаалааҕый? Бу туһунан биһиги Иннокентий ВАСИЛЬЕВТАН, Ньурба быыбардыыр уокуругуттан Ил Түмэҥҥэ талыллан 5 сыл үлэлээн кэлбит депутаттан ыйыталастыбыт.

– Ил Түмэҥҥэ “Ньурба акцияларын” атыылыыр туһунан боппуруоһу “Биир ньыгыл Арассыыйа” баартыйа бэрэстэбиитэлэ парламент бюджетнай кэмитиэтин мунньаҕар киллэрэ сылдьыбыта. Сүрдээх улахан мөккүөр тахсыбыта. Депутаттар утары куоластаабыппытын кэннэ, правительстволар “парламент маны быһаарбат боппуруоһа эбит” диэн, куоластааһыны дьиҥэ суоҕунан ааҕан, мунньах бэбиэскэтиттэн уһулан кэбиспиттэрэ. Сокуон быһыытынан, 100 мөлүйүөн иһинэн номинальнай сыаналаах акция дьылҕатын, республика правительствота бэйэтэ быһаарар диэн буолбута. “АЛРОСА-Нюрба” 10% акциятын номинальай сыаната 2 мөл. солкуобай, онон кини атыытын правительство бэйэтэ быһаарар диэн ханарытыллыбыта. Онтон правительство атыылыыр быһаарыыны бэйэтэ бүөмнээн ылбыта уонна ити соторутааҕыта 12 млрд солкуобайга атыылаата. “РИК” генеральнай дириэктэрэ Петр АЛЕКСЕЕВ уонна “АЛРОСА” президенэ Сергей ИВАНОВ илии тутуспут хаартыскатын көрдөххүт буолуо.

Ити биирэ. Иккиһинэн, правительство акцияны атыылыан иннинэ Ньурба улууһун салалтатын кытары сөбүлэҥ түһэрсибитэ. Акция атыыламмыт харчытыттан 2 млрд 300 мөлүйүөнүн Ньурба социальнай сайдыытыгар ыытыахтаах диэн.

Ол харчынан алта улахан объект тутуллуохтааҕа:

— Норуот айымньытын театра. Ньурба театра республика театральнай эйгэтигэр эрэ буолбакка, Россия таһымыгар ааттаах-суоллаах, ытыктанар үгэстээх, дириҥ силистээх-мутуктаах, баай историялаах театр.
— Спорт комплекса — ФОК. Урут, Сэбиэскэй кэм саҕана, биһиги улууспутугар спорт, ордук бокса көрүҥэ, балысханнык сайдыбыта. Ньурбалар спортсменнарынан аар-саарга аатырар этилэр. Кэлин эстии-кэхтии кэмигэр ыччаты спорка уһуйуу, сыһыарыы, дьарыктааһын ситимэ быстыбыта, ол билигин илэ көстөр. Күргүөмүнэн республика буолуохтааҕар, улуус чиэһин көмүскүүр кыахтаах биирдиилээн да спортсменнарбыт кэмчилэрэ ону туоһулуур. Оттон спорт диэн ыччаты эт-хаан эрэ өттүнэн буолбакка, өй-санаа, майгы өттүнэн эмиэ иитэр күүстээх көрүҥ буоллаҕа. Итини сөргүтэр хайаан да наада.
— Билиҥҥи тутулла сатыыр стадион бүтүөхтээх.
— Ньурба куоратыгар 280 миэстэлээх дьыссаат тутуллуохтаах. Куорат кэҥиир-улаатар, ыччат төрүүр-ууһуур, ол гынан баран дьыссаакка оҕону киллэрии улахан кыһалҕа буолан турар. Бу улахан дьыссаат тутуллара буоллар хартыына букатын тосту уларыйыах этэ.
— Күндээдэ оскуолата тутуллуохтаах. Бу оскуола, дьиҥинэн, тутуллан үлэҕэ киирбитэ ырааппыт буолуох этэ да, биллэр биричиинэннэн — харчыта да, бэйэтэ да суох. Хайыахпыый, ол суола сойбут харчыны ирдэһэн да түмүгүн булар уустук. Оттон оскуола тыа сиригэр тутуллара хайаан да наада. Оскуола суох буолла да, тыа эстэр.
— Ньурбатааҕы балыыһа комплексын иккис уочарата тутуллуохтаах. Бу маннык киин балыыһа Бүлүү улуустарыгар тыын боппуруос диэтэххэ омнуоламмата буолуо. Дьокуускайга барарга ырааҕын ааһан, уочарат, ороскуот бөҕө. Онон бэйэбитигэр аныгы оборудованиелаах, кэккэ специалист быраастардаах балыыһа силигин ситэрэ хайаан да наада.
Төһө да билигин үөһэ салалтаҕа уларыйыы-тэлэрийии буолбутун иһин, эрдэтээҥҥи кэпсэтии, чуолаан бу үөһэ ааттаабыт социальнай объектары тутууга “АЛРОСА-Нюрба” ПАО 10% акцията атыыламмытыттан, Ньурба улууһа туһаннаҕына сатанар. Ньурба сирин баайа, чуолаан — алмааһа Ньурба улууһун дьонугар-сэргэтигэр булгуччу туһаны аҕалыахтаах, социальнай сайдыытыгар көмө-тирэх буолуохтаах, — диэн Иннокентий ВАСИЛЬЕВ, норуот депутата этэр.

***
Прокопий ФЕДОРОВ,

Aartyk.Ru.

Обсуждение • 3

Добавить комментарий
  1. 6645

    12 миллиарды барытын Ньурбага биэриэхтэх этилэр , дьэ учугэйдик албынаасын буолбут Ньурбалары.

  2. не скептик

    нюрбинцы хронические аутсайдеры

  3. Сергей

    Раньше,надо было защитить интересы жителей Нюрбинского улуса. Помогать надо было главе Попову Б.Н. чтоб оставить за нюрбинцами эти акции. Счас, ходят с протянутой рукой,КРОХОБОРЫ — ДЕПУТАТЫ.
    Ходить надо прямо с поднятой головой, а не на полусогнутых.

Оставить комментарий