Дьааҥы Дулҕалааҕын кырдьаҕастара кыһыҥҥы мууһунан хааччылыннылар

Бу күннэргэ хоту улуустарга тыа дьоно кыһын устата иһэр муустарын ылар, хаһаанар түбүккэ сылдьаллар. Муус ылыыта – сэниэлээх эр дьон үлэтэ. Дьааҥы улууһун Дулҕалаах нэһилиэгэр сыл аайы үгэс быһыытынан соҕотох олорор кырдьаҕас, аҕам саастаах дьоҥҥо олохтоохтохтор мустан, субуотунньуктаан муус ылан биэрэллэр. Онтон олохтоох дьаһалта ол мууһу кырдьаҕастарга дьиэлэригэр тиэрдэн, тиэйэн биэрэр.

Быйылгы субуотунньукка Дулҕалаах эдэр, орто саастаах ыалларын аҕалара – Артём Андросов, Михаил Старостин, Сергей Сыромятников, Константин Никитин, Владимир Рожин, Ариян Чукров, Егор Волков кытыннылар, үөрэ – көтө үлэлээтилэр. Эр дьоҥҥо, ыал аҕаларыгар барҕа махтал буоллун, дэһэллэр нэһилиэк кырдьаҕастара.

***
Владислав  КРИВОШАПКИН,

Дьааҥы улууһун мунньаҕын дьокутаата.