Курс валют
$
64.2
0.35
70.67
0.25
Курс валют
Курс валют
$
64.2
0.35
70.67
0.25
Меню
Поиск по сайту

НЬУРБА УЛУУҺУГАР БАҺААРЫ УТАРЫ УРАТЫ ЭРЭСИИМ БИЛЛЭРИЛИННЭ

12.07.2019 14:20 0
НЬУРБА УЛУУҺУГАР БАҺААРЫ УТАРЫ УРАТЫ ЭРЭСИИМ БИЛЛЭРИЛИННЭ

Ньурба улууһугар баһаартан куттал 4-с кылааска тиийбититтэн уонна оройуон сиригэр ойуур уота туруута элбээбитинэн сибээстээн, от ыйын 12 күнүттэн баһаары утары ураты эрэсиим биллэрилиннэ. Быйыл уоттан сэрэхтээх буолуу сезона саҕаланыаҕыттан, бүгүҥҥү күҥҥэ диэри номнуо 28 ойуур баһаара турбута бэлиэтэннэ. Итинтэн 14 баһаар умуорулунна.


Ньурбатааҕы биир кэлим дьуһуурунай диспетчерскэй сулууспа салайааччыта Афанасий Кириллин иһитиннэрэринэн, от ыйын 12 күнүнээҕи туругунан 4 ойуур баһаара баар.

22 №-дээх ойуур баһаара Хорулаттан 22 км сиргэ, авиационнай хонтуруол зонатыгар 31 гааны сии сытар. Баһаары умуруорууга «Авиалесохрана» федеральнай тэрилтэ 22 үлэһитэ үлэлии сылдьар. Итиннэ эбии бэҕэһээ «Авиалесохрана» Үөһээ Бүлүүтэҕи филиалыттан 9 киһини илдьибиттэр.

23 №-дээх ойуур баһаара Таркаайы нэһилиэгиттэн 16 килэмиэтирдээх Бэс Күөлүгэр, авиационнай хонтуруол зонатыгар баар, иэнэ — 4 гаа. «Авиалесохрана» Ньурбатааҕы филиалын 13 киһитэ үлэлиир. Бүгүн кинилэр баһаары төгүрүйүөхтэрэ диэн кэтэһиллэр.

Бэҕэһээ 2 ойуур баһаара бэлиэтэннэ. Ол иһигэр Маарга Толоон диэн дэриэбинэттэн 5-6 км сиргэ уот турда, 27 №-дээх ойуур баһаарын быһыытынан регистрацияланна. Иэнэ — 1,5 гаа, уот төгүрүтүллэн турар, бүгүн манаан баран умулларыахтаахтар. 28 №-дээх ойуур баһаара Хаҥаластан 4-5 км сиргэ регистрацияланна. Иэнэ — 1 гаа. Олохтоохтор тахсан үлэлии сылдьаллар.

От ыйын 12 күнүнээҕи сарсыардатыгар космомониторинг быһыытынан улууска 7 термоточка көһүннэ. Хорулаҕа, Күндээдэ Араҥастаахтааҕар, Ээдьээҥҥэ уонна Маалыкайга. Итилэргэ нэһилиэнньэлээх пуннарга уонна экэниэмикэ эбийиэктэригэр куттал суоҕунан сибээстээн, өрөспүүбүлүкэтээҕи КЧС быһаарыытынан умуруоруу үлэтэ барбакка турар.

Биллэрин курдук 28 баһаартан 14 баһаарын бохсубуттара, 10 ойуур баһаарыгар өрөспүүбүлүкэтээҕи КЧС быһаарыытынан, нэһилиэнньэлээх пууннарга уонна экэниэмикэ эбийиэктэригэр куттал суоһаабатынан, умуруоруу үлэтэ ыытыллыбат.

«Ньурба куоракка тыал уларыйан буруо Күндээдэттэн 3 көстөөх Кугдаар диэн сиргэ авиационнай хонтуруол зонатыгар баар ойуур баһаарыттан кэллэ быһылаах. Бэҕэһээ итиннэ көтөн көрө сылдьыбыттара. Бөртөлүөт түһэр да сирэ суох, уу саамай чугаһа 5 км сиргэ баар. Итиэннэ уот нэһилиэктэн атын хайысханан бара турар. Тыал уларыйар, куттал үөскүүр кэмигэр туһааннаах үлэһиттэр тутатына тахсардыы бэлэмнэр. Бүгүн эбиэккэ диэри Роспотребнадзор салгын боруобатын анаалыстарын биэриэхтээх. Ойуур баһаардара хонтуруолга тутуллаллар, үлэ барар«, — диэн ЕДДС салайааччыта Афанасий Кириллин кэпсээнин түмүктээтэ.
Бүгүн сарсыарда улуустааҕы КЧС мунньаҕа ыытыллан, оройуон сиригэр-уотугар баһаары утары ураты эрэсиим биллэрэргэ быһаарылынна.

***

Ааптар: Геннадий АНТОНОВ

Оставить комментарий    

!