2005 сыллаахха Кыайыы знамятын көрсүбүппүт…

Историяны сэгэтэн

Бу Степан Саввин хаартыскаларыгар 2005 сыллаахха олунньу 26 күнүгэр Аҕа дойду Улуу сэриитигэр Кыайыы знамята Хаҥаласка кэлбитин көрөҕүт. Оччолорго бу өрөспүүбүлүкэтээҕи эстафета бэлиэ күнүн улуус баһылыга Анатолий Добрянцев анал дьаһала тахсан сонун тэрээһиннэр ыытыллыбыттара.

Кыайыы знамятын Хаҥалас кыраныыссатыгар көрсүбүттэрэ. Онтон Төхтүргэ, Өктөмҥө бэтэрээннэр, оскуолалар оҕолоро кыттыылаах тэрээһиннэри ыыппыттара, улуус салалтата, байыаннай хамыһаар Николай Андреев о.д.а. инники сылдьыбыттара.

Хаҥалас улууһуттан Аҕа дойду Улуу сэриитигэр 2879 киһи ыҥырыллыбыта, онтон 1134 буойун алаһа дьиэтигэр эргиллибэтэҕэ.

Улуу Кыайыы 80 сылын көрсө Өрөгөй знамятын быйыл Хаҥаласка олунньу 7 күнүгэр кыраныыссаҕа көрсүөхпүт, Кыайыыны уһансыбыт дьоммутун ахтан-санаан ааһыахпыт. Знамя нэһилиэктэринэн салгыы айанныа.

***
Людмила Аммосова, «Хаҥалас» хаһыат