Ааспыт өрөбүллэргэ Сунтаарга 2 улахан киһи клещкэ ытыттардыбыт диэн суһал көмө сулууспатыгар көрдөрүннэ.
Бу дьон Тойбохойго уонна Сунтаарга Стродка айылҕаҕа сынньана сылдьан клещкэ ытыттарбыттар. Билигин бу дьон доруобуйалара этэҥҥэ. Суһал көмөнү ыллылар.
Клещ энцефалит диэн кутталлаах вируһу тарҕатар. Бу ыарыыттан дьон өлбүт түгэнэ бэлиэтэнэр. Клещкэ ытыттарбыккытын биллэххитинэ үөнү бэйэҕит хостуу сатаабакка тутатына Сунтаар киин балыыһатыгар хирургия салаатыгар тиийиэхтээххит. Анал идэлээх дьон клеһи эккититтэн хостуохтара уонна иммуноглобулин диэн быһыы биэриэхтэрэ. Ону тэҥэ, кутталлаах вируска үөрэтэ бэрэбиэркэҕэ ыытыахтара. Бу күннэргэ клещтэн утары вакцина биэрэ тураллар. Эбии улуус иһигэр үлэ уонна хонуктаах лааҕырдарга сылдьааччы оҕолорго анаан вакцина кэлэрэ күүтүллэр.
Онон бу кэмҥэ, айылҕаҕа сылдьааччылар таҥаскытын-сапкытын көрүнэ сылдьыҥ. Сабыылаах таҥаһы кэтиҥ. Айылҕаттан кэлэн баран таҥаскытын тэбэнэр, эккитин сыныйан көрүнэр буолуҥ.
***
Мира АФАНАСЬЕВА
Оставить комментарий