Сунтаар аптекалара наадалаах эминэн толору хааччыллаллар

Ил Дархан ыҥырыытын Сунтаар улууһун олохтоохторо толору өйүүллэр. Коронавирус ыарыыта өрөспүүбүлүкэҕэ өрө туран, нэһилиэнньэ ортотугар сэрэтии үлэтэ барар. Ыарыыттан харыстанарга, бастатан туран, мааска, антисептик уонна араас эмп наада. Сунтаардар эминэн хааччыллыылара хайдаҕый? Ону билээри биһиги 28 №-дээх аптека дириэктэрин Александра Васильеваны кытта кэпсэтэ сырыттыбыт.

– Ыарыыттан харыстанарга сөп буолар эмп баар. Билигин тумуу ыарыыта туран, эмкэ наадыйар дьон элбээтэ. Мааска, антисептик атыыга бааллар. Биһиэхэ эмп күҥҥэ иккитэ кэлэр. Бүттэҕинэ сакаастыыбыт. Онон наада буолар эмп толору баар.

Онтон улуус олохтоохторо бу туһунан туох санаалаахтар эбитий?

Николай Иванов, Сунтаар нэһилиэгин олохтооҕо:

– Сылын аайы баччаларга тумуу өрө турар кэмэ. Ол эрэн коронавирус курдук сидьиҥ ыарыы дьон доруобуйатын ордук сиир, айгыратар. Ордук билигин саастаах дьон сэрэниэхтэрин наада. Кинилэр дьиэлэригэр олороллоругар сүбэлиэм этэ. Атыттар да элбэх дьон мустар сиригэр сылдьыбаттара, таһырдьа мааскалаах сылдьаллара ордук. Инньэ гынан кинилэр бэйэлэрин да, тулалыыр дьону да харыстыахтара. Онон барытыттан сэрэхтээх буолар кэм кэллэ.

***

«Сунтаар сонуннара» хаһыат