Калугаҕа баран хараххытын эмтэтиэххитин сөп

Баҕар кимиэхэ эрэ туһалаах буолуо диэн, Калуга куоракка баар харах балыыһатын туһунан суруйуум.

Гаджет содула таайан быһыылаах элбэх киһи хараҕынан эрэйдэнэр буолла. Билигин кыра сааһыттан ачыкы кэтэр оҕо олус үксээтэ. Саастаах өттө катаракта, глаукома курдук ыарыыларынан ыалдьара эмиэ үтүмэн.

Улуустарга, ордук хоту өттүгэр офтальмолог быраас кэмчи. Баар да буоллаҕына, аны, аныгы оборудованиелаах поликлиника бэрт сэдэх. Оттон республикатааҕы соҕотох харах балыыһатыгар сайын да, кыһын да атыыр уочарат. Уочараттаан-уочараттаан тиийбитиҥ кэннэ сатабыллаах, уопуттаах бырааска түбэһии – Таҥараҕа тиксэр кэриэтэ, эппэрээссийэҥ табыллара-табыллыбата эмиэ хаарты хараҕа.

Интернет үөдүйбүтүнэн туһанан, хас да сыллааҕыта Калугаҕа баар академик Святослав Федоров аатынан «Микрохирургия глаза» диэн клиника филиалыгар тиийэн турабын. Бу клиника филиаллара атын куораттарга эмиэ баар, ол иһигэр Новосибирскайга, Москваҕа. Москватааҕы филиалларын дьон сирэр  – «үлэһиттэр харчыга хараҥарбыттар», «ыарыһахха киһилии сыһыаннаспаттар» диэн суруйаллар.

Оттон Калугатааҕы филиал быраастарыгар махтанар дьон элбэх.  Онон Калугатааҕы филиалы кытары суруйсубутум. Төрүөтэ диэн, оччолорго, аҕам катарактатын эмтэтии этэ. Ол сахха «пандемия», «санкция» диэн тыл суох, онон омук сириттэн – германскай, американскай, бельгийскэй о.д.а. – оборудование, протез,  хрусталик арааһа баар кэмэ этэ. Саамай чэпчэки хрусталик – Россияҕа, сыаналааҕа – АХШ оҥоһуллубут диэн буолара. Уопсайынан, ким төһө сиэбэ уйарынан харах хрусталигын талан туруортарар кыахтааҕа.  Билигин, сэрэйдэххэ, арааһа талар да хаалбатаҕа буолуо.

Эппэрээссийэ барыта лазернай ньыманан оҥоһуллар буолан, оһоро да түргэн-тарҕан эбит этэ. Уонна саамай үчүгэйэ диэн:  хрусталик ханан да сиирэ-халты халыйбакка чопчу олоруохтаах миэстэтигэр олорор. Көннөрү быһаҕынан быһар эппэрээссийэҕэ бааһа да өр оһор уонна хрусталигы таба олордор эмиэ уустук диэн быраастар быһаараллар.

Калуга быраастарын саамай сөхпүтүм диэн наһаа «кэпсэтинньэҥнэр». Ыарыыҥ туһунан сиһилии кэпсээн баран, аны уруһуйдуу-уруһуйдуу хайдах ньыманан эппэрээссийэлииллэрин кытары кэпсээн-көрдөрөн биэрэллэр. Биһиэхэ оннук сиһилии кэпсиир быраас бэрт сэдэх буолбат дуо? Араас специалистары аҕыйах бириэмэ иһигэр түргэн баҕайытык ааһаҕын. Ким да ыйы-ыйдаан онно сыппат. Барыта сып-сап, чуолкай, биир күн иһигэр барыта быһаарыллар.  

Аны уочаракка  олорор дьон эмиэ олус тулуурдаахтар, үрдүк култууралаахтар. Ким да бүөр баттанан баран ааны бүөлүү турбат, уочараты бэрээдэктээбэт, быраастары үөхпэт, үҥсүөх буолан суоһурҕаммат. Икки ардыгар ытыктабыллаах сыһыаннаахтар.

Соторутааҕыта эмиэ ол клиникаҕа оҕолору көрөр отделениеларыгар оҕолору илдьэ сырыттым. ОМС полиһынан босхо көрдөрүөххүн сөп, ол гынан баран онно олохтоох поликлиникаҕыттан анал направление ылыаххын наада. Кыра ыарыылаах буоллаххына төлөөн көрдөрөрүҥ быдан судургу. Сыаната да удамыр – 2100 солкуобай иһигэр туох баар наадалаах аппараакка көрөн-истэн, эмин-томун, ачыкыҥ ырыссыабыгар тиийэ барытын суруйан биэрэллэр. Сүбэлииллэр-амалыыллар, ыйытыыгар сиһилии хоруйдууллар. Онон икки оҕо балтараа чаас иһигэр көрдөрөн бүттэ.

Калуга барарга-кэлэргэ улахан харгыһа суох. «Якутия» сөмөлүөтэ Внуково аэропордугар түһэр, онтон таксинан эбэтэр электричканан 1,5-2 чаас айаннаан тиийэҕин. Эрдэ клиника сайтыгар киирэн хаһан көрдөрүөххүн баҕараргын суруйтараҕын, улахан ыарыылаах буоллаххына диагнозкын, выпискаҕын барытын электронно түһэрэн эрдэ ыытар ордук.  

Манна диэн эттэххэ, глаукомалаах дьон анал направлениенан дойду бары клиникаларыгар босхо эппэрээссийэлэнэллэр. Олохтоох бырааскытыттан Форма 057 эриһэн туран ылыаххын эрэ наада.

Соторутааҕыта билэр ыалым улахан уоллара хараҕын сааҕа дэҥнэтэн Дьокуускайга үс ыйы быһа эмтэтэ сатаан эрэйдэммитин истэн, Калугатааҕы клиника быраастарын кытары булсуһуннаран биэрбитим. Бу күннэргэ этэҥҥэ эппэрээссийэлэтэн кэллилэр. Таарыччы ыал аҕата глаукоматын уонна катарактатын эппэрээссийэлэппит. Клиника быраастарыгар махталлара улахан, чуолаан үтүөкэннээх киһиэхэ, солбуйар дириэктэргэ Александр Михайлович Ивановка уонна глаукома хирургиятын отделениятын сэбиэдиссэйигэр Инна Александровна Молотковаҕа. Кырдьык, Александр Ивановы бэйэтин кытары билсэн-көрсөн турабын, наһаа үрдук култууралаах, аламаҕай майгылаах, улахан билиилээх учуонай быраас. 

А.М.Иванов,  заместитель директора по лечебной работе, врач-офтальмолог высшей категории, кандидат медицинских наук, заслуженный работник здравоохранения Калужской области

И.А.Молоткова, кандидат медицинских наук, врач-офтальмолог высшей категории

Онон ким сэҥээрбит, хараҕынан эрэйдэнэ сылдьар дьон Калугаҕа баран эмтэниэххитин, көрдөрүөххүтүн сөп.

Мантан аллараа клиника аатын уонна ссылкатын туруорабын:

“МИКРОХИРУРГИЯ ГЛАЗА” ИМЕНИ АКАДЕМИКА С.Н. ФЕДОРОВА
МИНИСТЕРСТВА ЗДРАВООХРАНЕНИЯ РОССИЙСКОЙ ФЕДЕРАЦИИ
КАЛУЖСКИЙ ФИЛИАЛ HTTP://EYE-KALUGA.COM/ONLINE-REGISTER/

***

Туйаара НУТЧИНА,

Aartyk.Ru

Хаартыскалары клиника сайтыттан ыллыбыт.