Урут уонна билигин…

Уулусса устун хаамабын,
Ол бу диэки көрөбүн.
Санаам миэнэ быһаҕас,
Тугум эрэ итэҕэс.

Таабырынныы сатаатым,
Онтон дьэ таайдым-
Ким да мээнэ хаампат,
Оҕо саҥата иһиллибэт!

Ааспыт үйэ оҕото,
Оонньуура эбээт баччаҕа.
Уһун күҥҥэ тото,
Хайа да тымныы күҥҥэ.

Харахпар көстөн кэллэ
Күлбүт сирэйэ мэлтэллэ,
Оччотооҕу кэм оҕото,
Мэник-тэник бэйэтэ.

Бэргэһэтэ хаҥнархай,
Иэдэстэрэ тэтэркэй,
Уолуга нэлэккэй,
Хаатыҥката хантархай.

Күрдьүгү сүргэйэр
Окуопа оҥостор.
Былааҕы былдьаһар
Хаһыыта алдьархай!

Атаакаҕа киирэр,
Кимиитэ баһырхай!
Куотар- саһар,аһарар,
Хаар буулдьа кыырайар!

Оонньуу быыһыгар,
Сорудаҕын өйдүүр-
Маһын хайытар,кыстыыр
Мууһун көйөр,таһар.

Онтон ойбоҥҥо ойор,
Ньирэйдэргэ уу баһар.
Ардыгар хаар күрдьэр,
Эмиэ да сорукка сүүрэр.

Тиритэр хорутар,
Мэктиэтигэр буруолуур.
Ол курдук күнү барыыр,
Уруок ааҕарын да саныыр.

Борук буолуута дьиэтин булар,
Кэпсээн-ипсээн күөдьүйэр.
Чэбдик- сэргэх күлүүтэ
Дьиэ иһин сэргэхситэр.

Ас сытыттан дуоһуйар,
Астына тото мотуйар.
Суумкатын хасыһар,
Уруоктарын ааҕар.

Дьиэ иһигэр-илии атах,
Көмөлөһөр,оҕо көрөр.
Олорон оонньуу түһэр,
Кинигэ,хаһыат бэрийэр.

Киэһэ оронун булар,
Утуйан мунна буккуруур.
Түүн түһээн кытта оонньуур,
Күлэн ылар,манньыйар.

Оттон билиҥҥи оҕобут,
Дьиэҕэ-бүкпүт саспыт.
Тымныыны сөбүлээбэт,
Соруга суох тахсыбат.

Баҕар мас кыстыан,
Оттуллар оһоҕо суох.
Ойбоҥҥо сүүрүөҕүн,
Хотоно эмиэ суох.

Күрдьүккэ оонньуоҕун,
Баҕалаах ким да суох.
Сорукка сылдьыаҕын,
Төлөпүөн,бассаап баар.

Көхсө нүксүххэй,
Уҥуоҕа унньулхай,
Санна холборхой,
Хаана кубархай.

Хаамара салбырхай,
Таҥаһа баҕас муодунай.
Кулгааҕа куруук бүөлээх,
Үксүгэр халыҥ ачыкылаах.

Телефон,планшет тэриллээх,
Бүгэн олорор муннуктаах.
Онно элбэх доҕоттордоох,
Санаа атастаһар дьоннордоох.

Сылайыар дылы сэлэһэр,
Хаартыска,ойуу ыытыһар.
Ардыгар кини да оонньуур,
Салгын ситимигэр эргийэр.

Ыҥырдахха соһуйар,
Ыктахха хардарсар-
Аҕыйах тылы ыһыктар,
Кэпсэппит саҕа сананар.

Аччыктыырын да билбэтэр,
Атыны саныы аһаабыта буолар.
Сирэр талар талымастыыр,
Кока-кола, чипсы көрдүүр.

Доширагынан үссэнэр,
Сакалаатынан саатыыр.
Түүн ортото ааһыытыгар,
Оронун хата булаахтыыр.

Көһүйбүт эт-сиин,
Дьэ арыый уоскуҋар.
Оҕо барахсан утуйан иһэн,
Түһүүр-түлэкэдийэр.

Кимниин эрэ этиһэр,
Тугу эрэ быһаарсар.
Кыҥыр-хаҥыр саҥарар,
Кыыһырбытынан утуйар.

Оҕо бары маннык диэбэппин,
Баһыйар үгүһүн-билэбин.
Сайдыыны утарбаппын,
Оҕо оонньуон баҕарабын.

Элбэх санаа элэҥниир,
Уруккуну -билиҥҥини тэҥниир…
Оттон олох устан иһэр,
Ол аайы оҕо уларыйар…

Таптал🌳Чагда.