Дьыала харчытыгар буолбатах

-Мантан кыра массыынаҕа түспэтэх киһи, – дии-дии Сахаайа «Прадотын» инники өстүөкүлэтин түһэрэн олорон күлэ-күлэ эппитэ бу баарга дылы. Кыһыл саһылтан тигиллибит сэлиэччигэ наһаа бэйэтигэр барсар этэ.

Оскуола кэнниттэн куоракка кэлэн үөрэх туттарсан баран киирбэккэ, убайыгар хаалан оҕо көрсүбүтэ, ол-бу быстах үлэҕэ киирэн үлэлии сылдьан Тимурдуун билсэн, сотору баҕайы ыал буолан икки оҕону төрөппүтэ.

Тимур Сахаайаны иккис ойоҕо этэ. Бастакытын кытары биэс сыл олорон баран оҕоломмокко арахсыбыттара. Онтон икки аҥыы баран, тус-туһунан ыал олоҕун тэринээт иккиэн оҕоломмуттара. Дьикти ээ, сорох доруобай да дьоҥҥо оҕо кэлэн быстыбат, онтон тус-туһунан бардахтарына хата оҕо-уруу бөҕө буолаллар.  Баҕар, хааннара сөп түбэспэтэ дуу, өбүгэлэрэ көҥөнллөрө дуу.

Таһыттан көрдөххө Тимурдаах Сахаайа олус бэртик олороллоро. Эр киһи киириилээх-тахсыылаах, эргитиилээх, булара-талара сүрдээх. Сахаайата хартыынаттан түспүт курдук эчи мааныта да бэрт, таҥара табатын курдук симиирэ.

-Икки оҕону төрөөн биэрбитим, ама хааччыйбакка, – диэн Сахаайа оҕо төрөөбүтүн улахан үтүөнэн ааҕынара.

-Дьиэҕэ олороргуттан сылайбаккын дуо? Ханна эмит киирэн үөрэниэххин, сөбүлүүр дьарыккын булуоххун, – диэн аҕа киһи быһыытынан сүбэлиирдии эппиппэр:

– Таах олорбоппун ээ, бу оҕолору оскуолаҕа, кружокка таһабын, ас астыыбын, дьиэбин көрөбүн.

– Оттон дьахтар бары оннук гынар ээ.

-Ол харчым тиийбэт буолан үлэлии, үөрэнэ киириэм дуо? Оҕонньорум иитиэхтээх буоллаҕа.

-Дьыала харчытыгар эрэ буолбатах буоллаҕа. Бэйэҥ киһи быһыытынан эмиэ үүнүөхтээх, сайдыахтаах, бэйэҥ интэриэстээх, идэлээх буоларыҥ туох куһаҕаннааҕый?

-Ээ, мин интэриэһим элбэх буоллаҕа.

-Дискотеканан, клубунан көрүлүүр интэриэс буолбатах, Сахаайа.

-Оҕолорун быраҕан ханна барыай, ким киниэхэ икки оҕону төрөөн биэрбитэй?!

-Эр киһи 90-гар диэри оҕо оҥоруон сөп. Уонна эр киһи оҕоттон тутуллубат ээ, киниэхэ дьахтар наада. Утуйарга эрэ буолбакка, кэпсэтэргэ эмиэ. Эр киһи дьахтарын сөбүлээбэт буоллаҕына, төрөппүт оҕотун да быраҕан барыан сөп, дьахтары сөбүлээтэҕинэ атын да киһи оҕотун иитиэн сөп.

Кыыһым оччолорго миэхэ өһүргэммитин сэрэйбитим. Онтон «ээ чэ атын дьон олоҕор тоҕо да ороостохпунуй, хас биирдии киһи бэйэтин олоҕун бэйэтэ оҥостор» дии санаабытым.

Уон биэс-алта сыл олорон баран Тимур Сахаайаттан арахсан атын дьахтарга барбыт этэ. Ол барбыт дьахтара үс оҕолоох, үөрэхтээх-хаардаах, үлэһит мааныта, бэйэтэ дьоҕус дьыалалаах.

Сахаайаны хас да сыллааҕыта көрсөрбөр эргэ баҕайы массыынатын харчыта суох буолан өрөмүөҥҥэ кыайан биэрбэккэ сылдьарын этэн суламмыта.  Саҥарар саҥата, үөхсэр үөхсүүтэ – «сааппат сирэй, төрөппүт оҕолорун быраҕан барбыта, туохха да көмөлөспөт, атын дьон оҕотун иитэ сылдьар» диэн этэ.  Оттон Тимур эр дьоҥҥо кэпсииринэн «наар көрдүүрүн эрэ билэр, туохха да хараҕа туолбат, айдааннаах, турар маска кытары күнүүлүүр, тугу да гыммат, акаары, атаах дьахтартан тулуйарын ааһан» арахсыбыт.

Уопсайынан, эр киһи да буоллун, дьахтар да буоллун бэйэтэ интэриэстээх, дьарыктаах, үүнэргэ-сайдарга тардыһыылаах, саҥаны, сонуну билэргэ-көрөргө дьулуһуулаах буолуохтаах. Киһи интэриэһинэй, нууччалыы эттэххэ – самодостаточнай буолара хаһан баҕарар ордук буолбатах дуо?

***

Туйаара НУТЧИНА,
Aartyk.Ru