Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Жанна ЕГОРОВА: “Билбэтэҕэ-көрбөтөҕө буолан бүтүөх!”

07.09.2018 21:31 1
Жанна ЕГОРОВА: “Билбэтэҕэ-көрбөтөҕө буолан бүтүөх!”

Бүлүү эбэ сүһүрүүтэ улахан араллааны тарта. Бу туһунан былаас, общественность бэрэстэбиитэллэрэ бэйэлэрин санааларын, туруорсууларын эттилэр.

Ил Түмэн бэһис ыҥырыылаах мунньаҕын депутата, Доруобуйа харыстабылын, социальнай көмүскэлгэ, үлэҕэ уонна дьарыктаах буолууга парламент сис кэмитиэтин солбуйар председателэ, үрдүк категориялаах врач Жанна Эдуардовна Егорова:

– Мин, өр сылларга Сунтаар улууһугар доруобуйа харыстабылын эйгэтигэр үлэлээбит киһи быһыытынан, АЛРОСА хампаанньа Бүлүү өрүһү киртиппитин өтөрүнэн оһоруллубат экологическай катастрофа быһыытынан сыаналыыбын. Бу – биир улуус,республика да иһинэн быһаарыллыбат, оһоруллубат улахан хоромньу таҕыста. Күн бүгүн да буолбатар, кэнэҕэски өттүгэр бу иэдээн тугунан тайаан тахсыаҕын саныахха ыарахан. Этэргэ дылы, өрүһү көрөн олорон уутуттан испэт, туттубат, булдуттан-аһыттан бэриһиннэрбэт – саха киһитигэр, олохтоох нэһилиэнньэҕэ накаастабылга тэҥнээх. Онон, тугу да быраҕан, умнан туран, уталыппакка, норуоппут тыыннаах хааларын туһугар, тахсыбыт иэдээни көннөрөр суһал дьаһаллары ылыахха наада. Нэһилиэнньэҕэ салгыы манна олорор, үлэлиир-хамсыыр, оҕо-уруу төрөтөр усулуобуйа булгуччу тэриллиэхтээх.

Мин, иэдээн тахсаатын утаа, Ил Дархан эбээһинэһин толорооччу Николаев А.С., АЛРОСА АК салалтатын мунньахтарыгар сылдьан, “барытыгар айылҕабыт барахсан буруйдаах эбит” диэбиттэрин саарбахтыы санаабытым. Кинилэр этэллэринэн, 50 сылга түспэтэх элбэх сөҥүү түспүт. Хата, сөҥүү биһигиттэн көҥүлэ суох, эбэтэр сэрэппэккэ түстэ диэн түмүк оҥоһуллубата. Сахаҕа эрэ буолуо дуо, хайа баҕар норуот муудараһыгар туох барыта иэстэбиллээх диэн өйдөбүл баар. Ама даҕаны, промышленнай тэрилтэлэр айылҕабыт баайын хостооһунолохтоох нэһилиэнньэҕэ, тулалыыр эйгэҕэ содула суох буоларыгар кыһаллаллара, атыннык эттэххэ, социальнай эппиэтинэһи сүгэллэрэ – ытык иэстэрэ буоллаҕа! Баары баарынан этэр баҕайыта. Бүлүү өрүс быйыл эрэ киртийбэтэ. Барбатах чэй курдук өҥнөммүт уубутугар общественность былаас уонна промышленниктар болҕомтолорун тарда сатаабыта ыраатта. Хомойуох, кэлэйиэх иһин, аныгы былаас нация доруобуйатыгар долгуйбат. Ол аҥаардас бу сайыҥҥы иэдээни нэһилиэнньэттэн бүтүн биир нэдиэлэ устата кистээбиттэригэр көстөр. Бу күннэргэ сүлүһүннээх уу сүүһүнэн килэмиэтири нөҥүөлээн, Лена өрүскэ тиийдэ. Кыратык даҕаны ырааһырбакка, кирин-хоҕун, дьаатын-сүлүһүнүн барытын сүкпүтүнэн, кур бэйэтэ кубулуйбакка!

Мин Сунтаарга үлэлии сылдьан хас даҕаны нэһилиэккэ искэннээх ыарыы таһыма тоҕо сыллата үрдүү турарын чинчийэн, онно сир баайын үөрэтэр дэлби тэптэриилэр сүрүн «буруйдаах» буолуохтарын сөп диэн түмүккэ кэлбитим. Кэлиҥҥи сылларга аны кирдээх, баары-баарынан эттэххэ, дьааттаах уу кыһалҕата турда. Ол иһин чуолаан Бүлүү сүнньүнэн олорор нэһилиэнньэ доруобуйатын чинчийиигэ, эмтээһиҥҥэ республика суолталаах государственнай программа наада, ол үбүлээһинин АЛРОСА хампаанньа уйунарын ситиһиллиэхтээх.Ону таһынан, промышленность айылҕаҕа содулун мониторинын нэһилиэнньэ билиитигэр таһаарыахха наада. Туох састааптаах, хайдах туруктаах ууну иһэллэрин, тутталларын билиэхтээхтэр, – диэн депутат этэр.

***

Марина МАРХАРОВА.

 

Обсуждение • 1

Добавить комментарий
  1. БАРЧА

    Хара мацнайгыттан маны барытын прав-во саба сытар.Кэлин “САПИ” тэрилтэ тутуьуохтаах этэ.Харчыны ыскайдаабакка барытын тэццэ тыыран районнары олохторун чэпчэтэр курдук.Эмп-топ балыыьа медтехника иьэр уу суол.Кыьал5а аахтахха элбэх.Бугун кэлэн соьуйан.Миэстэтигэр Охр. природы эколоктар улуус салайач. тугу да гымматтар.Дьон хаьыытата5ына да тарбанан да корботтор.

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»