Курс валют
$
73.33
0.77
85.88
0.42
Курс валют
Курс валют
$
73.33
0.77
85.88
0.42
Меню
Поиск по сайту

Владимир ПРОКОПЬЕВ: «Профессиональнай парламент икки палаталаах буолуохтаах»

07.01.2021 08:31 6
Владимир ПРОКОПЬЕВ: «Профессиональнай парламент икки палаталаах буолуохтаах»

Профессиональнай парламент туһунан кэпсэтиини арыйабыт. Комментарий да быһыытынан, ыстатыйа да быһыытынан редакция почтатыгар, ватцап нүөмэригэр бэйэҕит санааҕытын суруйан ыытыаххытын сөп.

Владимир ПРОКОПЬЕВ, Ил Түмэн депутата, парламент сир сыһыаныгар, айылҕа баайыгар уонна экологияҕа кэмитиэтин  председателэ, Ньурба быыбардыыр уокуругуттан «ЕР» испииһэгинэн киирбит бэрэстэбиитэл:

-Алексей Ильич [Еремеем] сөпкө этэр, профессиональнай парламент хайдах-туох таҥыллара улахан суолталаах. Республика Ил Дархана 35 бастайааннай депутаттаах профессиональнай парламент наада, онно партияларынан киирэр депутаттар ахсааннара 25%-тан элбиэ суохтаах диэн сорук туруорда.

Аныгыскы Ил Түмэн мунньаҕа талыллыан биир сыл иннинэ профессиональнай парламент хайдах-туох үлэлиэхтээҕэ, хайдах көрүҥнэнэрэ, структурата олох чопчу быһаарыллан бүтүөхтээх. Онно Ил Дархан да, Ил Түмэн да бииргэ сүбэлэһэн, үлэлээн аныгыскы мунньах тутулун толору оҥоруохпутун, толкуйдуохпутун наада. Сыалбыт-сорукпут биир — республика интэриэһэ, онон бытаххай атааннаһыы, иирсээн букатын суох буолуохтаах.

Аныгыскы Ил Түмэн быыбыра 2023 сылга буолар. Быйылгыттан саҕалаан профессиональнай парламент хайдах буолуохтааҕын дьүүллэһэн барыахтаахпыт. Өскөтүн быыбардааччы ахсаанынан ылан депутаттары талар буоллахха, 35 депутат иһигэр элбэх миэстэни Дьокуускай куорат уонна промышленнай оройуоннар бэрэстэбиитэллэрэ ылыахтара, атын аҕыйах нэһилиэнньэлээх эрээри улахан территориялаах улуустар интэриэстэрэ парламеҥҥа ситэ учуоттаныа суоҕун сөп. Ол иһин, мин саныахпар, икки палаталаах парламент наада. Ил Түмэн урукку 1-кы,2-с ыҥырыылаах мунньаҕын курдук.  35 депутат бастайааннай буолар уонна 35-һэ үөһээ палатаҕа талыллаллара мин санаабар сөп этэ. Оччотугар Саха сирин бары муннуктара парламеҥҥа бэйэлэрэ бэрэстэбиитэллээх буолуох этилэр.

Ил Түмэн икки палаталаах — Бэрэстэбиитэллэр уонна Республика — эрдэҕинэ сүрдээх көдьүүстээхтик үлэлиир этэ. Ол оннук көрүҥү төнүннэриэххэ наада дии саныыбын. Оччотугар Аллараа палата күннэтэ киирэр сокуоннарынан үлэлиэх этэ (билигин федеральнай повесткаттан куоттарарбыт элбэх), оттон улахан, республиканы барытын таарыйар, суолталаах боппуруостарга —  каадыры анааһын, сир, баай-дуол сыһыанын боппуруостара, бюджет тыырыыта — сылшга биирдэ-иккитэ, муҥутаан кыбаарталга биирдэ улахан мунньахха Үөһээ палата депутаттара бары кэлэн үлэлээн барыах этилэр.

Мин саныахпар икки палаталаах парламент функциятын чопчу тыырыстахха маннык модель биһиги республикабытыгар оруобуна барсыах, сатаныах этэ.

…Оттон «федеральнай территория» диэн өйдөбүл киирбититтэн наһаа дьиксинэр наадата суох дии саныыбын. Урут сэбиэскэй саҕаттан ЗАТО диэн (закрытые административные террриториальные образования) сокуон баар. Сабыылаах куораттар, байыаннайдар эҥин, ол оннук курдук буолуон сөп. ЗАТО туһунан сокуон билигин да баар, үлэлиир, дойдуга оннук территориялар элбэхтэр.

Саха сиригэр ЗАТО хаһан да суох этэ. Тиксии эҥин — кыраныыссаҕа турар бөһүөлэк буоларын быһыытынан «сабыылаах» дэнэрэ, ол эрээри ЗАТОҕа хаһан да киирбэтэҕэ. Республикаҕа биэс улуус Хоту муустах байҕал кытыытыгар сытар, кинилэр эмиэ кыраныыссаҕа сытар буолан урут эмиэ кэлии-барыы бэрэбиэркэлэнэр этэ.

***

Aartyk.Ru

 

Обсуждение • 6

Добавить комментарий
  1. Коннору

    Прокопьев адьас сопко этэр. Лучшее давно забытое прошлое. Улуустартан биирдии депутат баар буолара адьам ордук этэ. Улуус дьоно бысаччы корон талаллара. Билигин сорох улуустар уокурук диэннэ киирэн атын улууска самсык, кусаган дьукаах курдук киирэн депутат талбыта буолан дьаабыланаллар

  2. Кинээс

    Улэлии олорор депутаттар республика законодательнай систематын обьективнайдык быьаарар кыахтара суох. Кинилэр бастатан туран бэйэлэрин интэриэстэрин корунэллэр. Ол Прокопьев В.М. этиилэриттэн чынха костор — 70 депутаты хаалларыахха диэн. Бэйэлэрин уйэ тухары олорор миэстэлэрин хаьааналлар. Ол 35 «верхняй» палата5а эмиэ билигин курдук куттуоннээхтик улэлээбэккэ ойдоо5умсуйэ олорор ба5алаахтар.
    Профессиональнай парламент диэн сокуону суруйуу. Онно хас оройуон аайыттан депутат наадата суох. Нэьилиэнньэ интэриэьин онто да суох тиритэ-хорута комускуур урдук сололоохтор элбэхтэр — администрация, райсовет, правительство, общественнай сэбиэттэр, палаталар…

    • аласов жив

      саха дьоно туруорсар сирэйэ суох хаалар туруктаахпыт диэбит ол агыйах профи депутаты олигархтар хантан эрэ хамнаска олордуохтара буттэгэ ол дии ким эрэ карманнай ил тумэнэ буолар, прокопьев кэннигэр элбэх саха дьоно турар ньурбалар эрэ буотах атын да саха депутаттар кэннилэригэр саха дьоно, нэhилиэктэр, улуустар тураллар саха омук лоббита буолаллар ону суох онорон марионетка театр тэрийэ сатыыллар ээ

  3. Сеня

    Сопко этэллэр, ити депутакка уйэлэрин тухары олоро сатыыр дьоннор бааллар, кормушка оностон. Ол то4о элбэх законнары суруйан-айан та4ааралларый сылга? Барыта москва бы4аарар, сахалар ыытар поправкаларын тьфу дииллэр. Би4иэннэрэ федеральнай законнарга биир икки тылы уларытан баран саха сирин закона диэн бигэргэтэллэр-аатыраллар. 35 депутат хааллын, ол гынан баран постояннай буолбатахтар. Кун аайы сана закон ама та4арбаттара буолуо. 70 депутат, оссо икки палата буола буола хааллахтарына туох экономията кэлиэй. Эмиэ расход бо5о, командировкалара, астара танастара, улуустарга бараа4ыннара. Билинни уйэ5э 35 депутат саамай соп, кэлэ бара улэлээтиннэр, постояннай буолбатах. Ити саввин уаров курдук олуохтэригэр дылы урдук хамнаска сылдьаары, 250 т.с. пенсия5а бараары гыналлар. Соп буолуо, дистанционно улэлээтиннэр 35 ки4и.

  4. Евсеев

    Сложнейший вопрос, но созревший давно. Надо искать золотую середину.

  5. Кинээс

    Если уж на то пошло, «верхнюю» палату можно образовать из председателей райсоветов, которые в установленном порядке избраны в каждом районе. На общественных началах, без дополнительной оплаты, для окончательного утверждения законодательных актов республики.

Оставить комментарий