Сырдык сылыга уонна Дабыл саҥата

Хас да күннээҕитэ бассаап ситимигэр Алексей Божедонов – Сырдык “билгэлээтим, Айыылар илдьиттээтилэр” диэн видео устан тарҕаппыта. Кини онно атырдьах ыйын 21 күнүгэр 2021 сыллаахха (Саха сиригэр 22-с чыыһылаҕа) АХШ интернети быһыа диэн “көрүүлэммитэ”. Дьону 1,5 ыйга аһыыр аста хаһааныҥ, интернет бардаҕына хоргуйуу тахсыан сөп” диэн сылыктаабыта.

Алексей БОЖЕДОНОВ-Сырдык

Дьолго Сырдык сылыга туолбата. Бүгүн атырдьах ыйын 22 чыыһылата даҕаны этэннэ олохпут, кур бэйэтэ кубулуйбакка диэбиккэ дылы, уста турар.

Сырдык сылыгын кэнниттэн Анатолий Павлов-Дабыл эмиэ бассаап ситиминэн аудиозапись тарҕаппыта. Кини онно наар куһаҕаны түүйүү, ыраланыы сиэрэ суоҕун, сата баһа хамсатарын, тардарын аньыынан ааҕарын туһунан эппитэ. Мээнэ тыллаһар, куһаҕаны үөтүү сиэрэ суох, сэттээх-сэлээннээх, киһи санаата туолар айылгылаах, салгыны хамсатар сыыһа, сиэлэ-кутуруга содуллаах буолуон сөп диэн кини эппитэ.

Онон, Дабыл санаата, тыллара сөп буолан таҕыста.

Анатолий ПАВЛОВ-Дабыл

Анатолий Павлов-Дабыл “Кэскил” хаһыакка өр сыл үлэлээбитэ, журналист, публицист, суруйааччы, саха итэҕэлин, философиятын тарҕатар дьонтон биирдэстэрэ.

Хас биирдии саха хааннаах киһиэхэ, үөрэҕиттэн, чыыныттан-хааныттан тутулуга суох Айылҕа оҕотобун диир өйдөбүл хааныгар иҥэ сылдьар. Ким эрэ улаханнык итэҕэйэр буолуон сөп, ким эрэ кыратык. Ону туһанан дьону аймыыр төһө сиэрдээҕэ буолла… Билигин онто да суох дьон ыгыллан сылдьар кэмэ, сайыны быһа буруо, уот-хоруо, от-мас кыһарыга, ыарыы. Тура-тура оннук куһаҕан буолуо, оннук быһылаан тахсыа диэн куттуу, куттана, дьааххана сырыттахха, оттон өй-санаа да, эт-сиин да өттүнэн киһи кэбириир буоллаҕа.

***

Парасковья НИКАНОРОВА,

“Аартыкка” анаан.