Саха киинэтэ аан дойду аартыгын арыйар

Михаил Лукачевскай устубут “Кыталыктар кырдаллара” диэн киинэ Бангладешка баран аан дойдутааҕы фестивальга чулуу оҕо киинэтин аатын ылла. Ол туһунан “Сахафильм” пресс-сулууспата иһитиннэрэр.
Лукачевскай хартыыната элбэх киинэ фестивалыгар кыттан ситиһиилэннэ. Аҕыс саастаах уолчаан ийэтэ суох хаалар. Аҕата кинини уоскутаары “ийэҥ кыталык буолан көттө” диэбитин итэҕэйэн, ийэтин көрсөөрү кыталыктары көрдүүрүн туһунан бэрт уйаннык, киһи сүрэҕин долгутардыы уһуллубут киинэ.
Оттон “Карина” (реж. Марианна Сиэгэн) саха киинэтэ билигин Киргизия, Казахстан кинотеатрдарыгар көрдөрүллэ сылдьар.
***
Aartyk.Ru
P.S.: Соторутааҕыта интервью ылбыт дьонум санаалара:
-Сүүс сыл буола-буола история хатыланар диэн этэллэр. Сүүс сыл анараа өттүгэр сахаҕа сытыы-хотуу, талааннаах, айдарыылаах эдэр дьон норуоттарыгар автономияны аҕалбыттара, чаҕылхай көлүөнэ үөскээн саха норуотун историятыгар улахан сайдыыны киллэрэн, соргутун олохтоон барбыта. Билигин саха аан дойдуга тугунан тахсар кэмэй? Духуобунаһынан дии саныыбын. Ол туоһутун биир көстүүтэ – саха киинэтэ, – диэн Госдума депутата Сардаана АВКСЕНТЬЕВА эппитэ.
Николай Иванов – Ньыгыл Уус:
-Айылҕа саханы харыстыыр. Былыр өбүгэлэрбит бары кэриэтэ аһаҕас харахтаах, эттээх, ичээн дьон буоллахтара. Онтон ааспыт үйэҕэ Айыыларбыт биһигини харыстаан барыбытын сабан, саһыаран кэбистэхтэрэ. Уруккубут курдук аһаҕас сылдьыбыппыт буоллар, тоноон бүтэрэллэр, ордубуппут псих балыыһанан хаалыах этибит. Билигин үйэ уларыйда, онон саха аһыллан, өбүгэтин билиитин төттөрү ылынан эрэр. Ол бары эйгэҕэ барытыгар көстөн иһэр: искусствоҕа, култуураҕа, духуобунаска.
Туйаара НУТЧИНА
Оставить комментарий