Бордоҥ нэһилиэгин күн-күбэй ийэлэрин туһунан кинигэ таҕыста

“Бордоҥ сүбэтэ” биир дойдулаахтар общественнай түмсүү салайааччыта, учууталбыт Мария Петровна ЕВСЕЕВА бу күннэргэ маалыкайдарга дьоһуннаахай бэлэх оҥордо. “Ийэлэрбит барахсаттар” диэн Бордоҥ нэһилиэгин ийэлэрин туһунан ахтыылары хомуйан, сүүрэн-көтөн, кэпсэтэн улахан кинигэ бэчээттэтэн таһааттарда.

Мария Петровна бу алтыс кинигэтин бэлэмнээн таһаарда.

“Маалыкай орто оскуолатын туһунан, аҕам, убайым, бииргэ үөрэммит доҕотторум, бөдөҥсүтүү иннинэ олоро сылдьыбыт, үөскээбит-улааппыт Улахан Күөлбүт туһунан кинигэлэри сааһылаан, эрэдээксийэлээн, мунньан-тараан таһааттарбытым. Кинигэ аата кинигэ, үйэлэргэ хаалар өйдөбүнньүк. Ол иһин бу дьыаланы ылсан үлэлиибин”, – диэн кини этэр.

Мария ЕВСЕЕВА өр кэмҥэ Маалыкай оскуолатыгар история учууталынан, дириэктэринэн, нэһилиэк баһылыгынан үлэлээбитэ. Элбэх оҕо ийэтэ, РФ уопсай үөрэхтээһинин бочуоттаах үлэһитэ, Бордоҥ нэһилиэгин Бочуоттаах олохтооҕо, “Бочуоттаах учуутал” о.д. а. үтүө ааттаах киһи. Энтузиаст, кыаҕа-талаана тиийэринэн билигин Дьокуускай куоракка олордор, үлэлээтэр-хамсаатар даҕаны дойдутун дьонун кытары куруук билсэ-көрсе, тэрийсэ, салайса сылдьар көхтөөх киһи.

Бордоҥ нэһилиэгин ийэлэрин туһунан кинигэ таһаарар санаата хайдах үөскээбитин маннык кэпсиир:

“Ийэбин билиҥҥэ диэри суохтуубун, ахтабын, санаабатах күнүм суох, онтон сиэттэрэн элбэх ийэни сырдатарга сананан, учуутал буолан, оҕону иитэр ньымаларын чорботон суруйар санаам киирбитэ. Иитиэхтээн сылдьыбытым олох ыраатта. Онтон ааспыт 2019 сайын дойдубар ыһыахха бара сылдьан олохтоох музейтан кыра материал аҕалбытым. Ол кэмтэн саҕаланан сайыннары-күһүннэри күүскэ дьаныһан, сыралаһан үлэлээтим. Үлэм түмүгүттэн астынным”, – диир.

“Ийэлэрбит барахсаттар” кинигэ «Компания «Дани -Алмас» ХЭТ кинигэ кыһатын иһинэн бэчээттэнэн таҕыста. “Кинилэри кытары 2016 сылтан үлэлэһэбин, кинигэ баара-суоҕа 200 экземплярдаах. Үп кырыымчык, сыана халбаҥныы турар буолан тираһа, хомойуох иһин аҕыйах”, – диир.

Дьонун, дойдутун үйэтитэ сылдьар киһибитигэр махтаныаҕыҥ, сыралаах үлэ түмүгэ буоларын айар дьон билэр, сыаналыыр буолуохтаахтар.

***

Бордоҥ нэһилиэгин (Маалыкай сэл.) олохтоохторо,
“Аартыкка” анаан.