БИҺИГИ КИЭН ТУТТУУБУТ – Владимир Михайлович ГОЛОКОВ

Тыа хаһаайыстыбатын салаата – бу ураты, киһиттэн уһулуччулаах тулууру, билиини-көрүүнү ирдиир үлэ, ол гынан баран эмиэ туһунан тыыннаах, киһини бэйэтигэр тардар дьарык. Ол да иһин былыр былыргыттан биһиги өбүгэлэрбит Дьөһөгөй айыыланан, Аан Алахчын хотуннанан, Байанайданан бу кэмҥэ диэри бу салаалары өрө тутан кэллибит.

Владимир Михайлович Голоков  тыа хаһаайыстыбатын салаатыгар эдэр сааһыттан мускуллан улааппыт буолан «Бөртө сылгы собуота» ХЭТ-ҕэ үлэҕэ киирэригэр билиилээх-көрүүлээх киһи кэлбитэ.  Кини  манна ,билигин субан сүөһү көрүүтүгэр  үлэлиир.

Владимир Михайлович бу үлэлиирин тухары ылсыбыт үлэтигэр ураты бэриниилээх, үрдүк квалификациялаах үлэһит быһыытынан биллэр. Кини ылыста да үтүө суобастаахтык үлэтин толоро, үмүрүтэ сылдьарын хаһаайыстыба үлэһиттэрэ бэлиэтииллэр. «Бөртө сылгы собуота» хаһаайыстыба сылгы салаата да буоллун, ынах сүөһү хайысхата буоллун, бородууксуйаны астааһын да буоллун, манна элбэх үтүө суобастаахтык үлэлиир дьон урукку колкуос, сопхуос саҕанааҕы үлэлээбит дьоннорун үтүө үгэстэрин сүтэрбэккэ үлэлээн билигин кэлэр көлүөнэ ыччакка холобур буола сылдьаллара хайҕабыллаах дьыала. Кинилэр истэригэр Владимир Михайловиһы эмиэ киллэриэххэ сөп. Хаһаайыстыба бу сылларга үлэҕэ ситиһиилэрэ, производственнай көрдөрүүлэр улаата тураллар. Ааспыт сылга тэрилтэ үрдүнэн 893 ынах сүөһү, ол иһигэр ынаҕа 391 төбө баара биллэр. 2024 сыл үүт валовай ыаһына 1272 туоннаҕа тэҥнэспит. Барыта 385 ынах төрөөбүт. Биир ынахтан ортотунан 3116 киилэ үүт ыанара ситиһиллибит. Үчүгэй көрдөрүү. Итиннэ барытыгар Владаимир Михайлович үлэтэ кырата суох диэн бигэтик этиэххэ сөп. Ити сыаналанан Владимир Михайлович Голоков Хангалас улууһун тыатын хаһаайыстыбатын департаменын уонна СахаӨрөспүүбүлүкэтин тыатын хаһаайыстыбатын уонна ас-үөл бэлиитикэтин министиэристибэтин грамоталарынан, махтал суруктарынан уонна харчынан бэлиэтэммит.

Владимир Михайлович олохтоох дьон ортотугар үтүө аатынанбиллибит киһи. Кини дьоҥҥо сыһыана, аһыныгас майгытабииргэ үлэлиир дьонугар, нэһилиэнньэ ортотугар аптарытыата үрдүүрүгэр тирэх буолар. Кини уопсастыбаннай үлэ актыбыыһа, аҕалар кулууптарын чилиэнэ, үс оҕо амарах аҕалара. Киһи үөрэ көрөрө диэн бу хаһаайыстыбаҕа Владимир Михайлович курдук саас ортолоох дьон, эдэр ыччат сыстан үлэлиирэ. Билиҥҥи кэмҥэ ити үтүө холобур.

***
Прокопий Хабаров