Англияҕа Максим Унаров «Ыһыах» быыстапката аһылынна

Бу дьыл сэтинньи 10 күнүгэр Великобритания Абердинскай университетыгар  Максим Унаров «Чаҕылхай күн сырдыга» диэн ыһыахха аналлаах фото-быыстапката аһылынна.

Фотограф Максим Унаров СГУ медицинскэй факультетын бүтэрбитэ, идэтинэн быраас. Кини төрөппүттэрэ Зинаида Унарова уонна Владимир Иванов республикаҕа биллэр-көстөр искусство үлэһиттэрэ.

Максим Владимирович  хаартысканан оҕо эрдэҕиттэн үлүһүйэн дьарыктанар.  «Чаҕылхай күн сырдыга» диэн быыстапка Англия гуманитарнай наукаларын искусствоҕа научнай чинчийиилэрин фондатын иһинэн ыытыллар.

Быыстапка кэмигэр Сергей Потапов «Дьөһөгөй Айыы» киинэтэ көрдөрүллүөҕэ.

Саха сирин олохтоохторо 2015 сыллаахха Художественнай музейга турбут «Ыһыах» диэн Британскай музей коллекциятыттан кэлбит экспонаты олус сэргээн көрбүттэрэ.

Ыһыах. Сэлии муоһа. Британскай музей коллекцията.

Урукку уонна билиҥҥи искусство сайдыыларын туһунан кэпсэтии, санаа атастаһыыта олус тэрээһиннээхтик ааспыта. Онтон эр ылан бу бырайыак ааптардара үлэлэрин салгыы ыыталлар.  Ол туоһутунан фотограф Максим Унаров «Чаҕылхай    күн сырдыга» быыстапката буолар.

В ожидании солнца. Фото М.Унарова.

Эмчит идэлээх Максим Унаров номнуо Абердиҥҥа тиийэн быыстапка аһыллыытыгар бэйэтэ кытынна. Бырайыак ааптардарынан Алисон Браун,  Элеанора Пирс уонна биһиги биир дойдулаахпыт  Татьяна Аргунова-Лоу буолаллар.

Шотландия олохтооҕо Абердинскай университет антропологияҕа старшай преподавателэ Татьяна Аргунова-Лоу бу быыстапкаҕа бэйэтин үлэлэрин эмиэ туруорбутун биир дойдулаахтара сэргээн көрүөхтэрэ диэн эрэнэбит. Быыстапка муус устарга диэри турара былааннанар.

Татьяна Аргунова-Лоу.

Татьяна Аргунова-Лоу быыстапка туһунан маннык этэр:

-Биһиги быыстапкабыт 2015 сылтан саҕаламмыта. Онно биһиги Абердинскай университет чинчийээччилэрэ «Үйэ устата айан» диэн ааттаах быыстапка чэрчитинэн, Саха сиригэр сэлии кыыл муоһуттан кыһыллыбыт «Ыһыах» диэн композицияны аҕалан быыстапкалаабыппыт. Бу композицияны кимэ биллибэт маастар  19 үйэҕэ оҥорбут. 1867 с. бу үлэни Аан дойдутааҕы Парижскай быыстапкаҕа илдьибиттэрин оччотооҕу музей үлэһиттэрэ  атыылаһан Британияҕа аҕалбыттар. «Үйэ устата айан» диэн ааттаах быыстапка Саха сиригэр сыл аҥаара турбута. Биһиги быыстапкабыт сыалынан билиҥҥи ыһыах уонна урукку ыһыах уратыларын үөрэтии буолар. Икки сыллааҕыта биһиги Саха сирин олохтоохторугар быыстапка оҥорбут буоллахпытына, билигин Шотландия олохтоохторугар ыһыах туһунан билиһиннэрэбит. Шотландецтарга биһиги ыһыахпытыгар майгынныыр Хайлэнд Гэймс (Highland Games) диэн бырааһынньыктаахтар. Ол иһин шотландецтар быыстапканы сэргээн көрүөхтэрэ уонна бэйэлэрин култуураларыгар майгыннатыахтара диэн эрэнэбин.

***

Aartyk.Ru