Курс валют
$
87.96
2.54
94.26
2.81
Курс валют
Курс валют
$
87.96
2.54
94.26
2.81
Меню
Поиск по сайту

Үс куттаах саха

10.09.2023 10:25 0
Үс куттаах саха

Ийэ кут, Буор кут,  Салгын кут

Ийэ кут – бу энньэ хааҥҥынан бэриллэр ийэҕиттэн, аҕаҕыттан, эбээлэргиттэн, эһээлэргиттэн, өбүгэлэргиттэн хаалар информация. (Подсознание. Интуиция). Өбүгэлэргиттэн бэриллибит өтө көрөр өй. Киһи киһи киэнэ араас. Уҥа полушарие үлэтэ. Дьахтар киһиэхэ ордук сайдыылаах.

Искэр баар көстүбэт эйгэ. Генетика, квантовая физика диэн наука салаалара үөрэтэллэр. Сирэйиҥ-хараҕыҥ олоруута, этиҥ-сииниҥ оҥоһуута, дьоҕуруҥ, сатабылыҥ, майгыҥ-сигилиҥ, дьүһүнүҥ-бодоҥ,  өбүгэлэргиттэн бэриллибит информация барыта баар, ыарыыларга тиийэ. Атыннык – микромир, мир элементов – Аллараа дойду.

Ийэ кут информацията хромосомаларга бааллар, Орто дойдуга хаалар, оҕолоргор, сиэннэргэр бэриллэн баран иһэр. Көстүбэт эйгэ, билиҥҥи наука кыратык көрөр, үксүн билбэт, киһи 98% геномун “мусор” диир.

Олоҥхолорго Айыы бухатыыра Абааһы уолун кытта киирсэр, абааһыны бэйэтин кытта буолбатах. “Абааһы уола” диэн бэйэҥ искэр баар куттал, иҥсэ-обот, һиэри таһынан арыгылааһын, куһаҕан, хом санаалар, дьонтон үрдүктүк сананыы, уоруу, кылгастык эттэххэ, һиэри таһынан быһыылар.

Абааһы диэн Аан дойдуга тарҕаммыт өйдүбүллэр – иҥсэ-обот, албын-көлдьүн, уоруу, һиэри таһынан арыгылааһын, – похоть, распутсво, блуд, уо.д.а. “человеческие пороки” диэххэ. 

Абааһыны бэйэтин кыайбаккын, холобура “пьянство” диэн аан дойдуга тарҕаммыт өйдөбүлү суох гыммаккын, абааһы уолун, кыыһын – оҕотун (искэр баар арыгыга тардыһыыны) кыайыаххын сөп. Туох баар куһаҕан санаалары, мөкү дьаллыктары, эйигин кэбирэтэр, таҥнары тардар күүстэри, хом санаалары бэйэҕ эрэ кыайыаххын сөп. Атын дьон, Айыылар, өбүгэлэриҥ эйиэхэ сүбэ эрэ биэрэллэр. Оҥорорун бэйэн эрэ оҥороҕун.  Саха тылыгар биир эрэ тыл баар “Г” дорҕоонтон тахсар тыл – Гын!. Бэйэн олоххун бэйэҥ эрэ оҥостоҕун.

***

Буор кут – турар бэйэҥ, этиҥ-сииниҥ.  Нууччалыыта – физическое тело. (Сознание. Көстөр эйгэ. Син элбэҕи киһи-аймах үөрэтэн билэр.  Логика – хаҥас полушарие үлэтэ. Куолу өй. Эр киһиэхэ ордук сайдыбыт. Медицина, физиология уо.д.а араас наука салаалара үөрэтэллэр). Атыннык эттэххэ макромир – мир обьектов, люди, животные, растения, горы, моря, океаны – Орто дойду.

Орто дойдуну уонна Аллараа дойдуну ситимниир биир – Уу.

Уу нөҥүө информация бэриллэр аллараа дойдуттан Орто дойдуга.  Сахалар утуктаатахпытына “уум кэллэ” диибит. Киһи иһигэр баар уута бөл турукка киирдэҕинэ киһи утуктуур. Ити сырдык-хараҥа уларыйар кэмигэр буолар. “Бөл уу” диэн турар уу – стоячая вода. Бөлүөхсүйбүт хаан диэн өйдөбүл баар.  Утуйдаххына подсознаниеҕын кытта ситимиҥ күүһүрэр.

Киһиэхэ төрүүрүгэр 5 көрүү-истии бэриллэр: тутан-хабан көрүү, амсайан көрүү, сыттаан-сымардаан көрүү, хараххынан көрүү, кулгааххынан истии. Бу 5 көрүү-истии аан дойдуну (Орто Дойдуну) билэргэ, анаарарга, өйдүүргэ төһүү күүс буолар. Ону кытта логикаҕын (куолу өй) уонна интуицияҕын (өтө көрөр өй) холбоотоххо, олох моһоллорун этэҥҥэ ааһаҕын, аһыыгын-сиигин, тахсан киирэҕин.

Буор кут Орто дойдуга үүнэн турар үүнээйилэринэн, хамсыыр харамайдарынан аһылыктанар. Эбэтэр эт-үүт, сыа-арыы сиигин уутун иһэҕин, ону этиҥ-сииниҥ үнтү мэлийэн, буһаран, арааран – белок, жир, углевод, микроэлементы таһымыгар кыччатар, дьэ оччоҕо  сэньиэ, күүс-уох киирэр. 

*** 

Салгын кут –  быһаарарга саамай уустук өйдөбүл. Салгын куттаах буолан киһи толкуйдуур, үөрэнэр, айар тутар, тыынар тыыннаах буолар. Киһи куйаары кытта ситимэ салгын нөҥүө барар. Салгын диэн тыл саха тылыгар өйдөбүлэ киэҥ, нууччалыы “воздух” эрэ буолбатах. “Салгыҥҥа оҕустараайаххыный” диэччибит. Охсор буолла да күүс буолар, салгыны күүс (стихия) курдук ылынабыт, ууну, уоту эмиэ. (Сверхсознание. Таскар баар көстүбэт эйгэ. Өндөр өй. Мегамир-мир систем. Солнечная система, галактика, вселенная и.т.д. Тугу да билбэппит). Мэйиигинэн толкуйдаан (салгын куту туһанан), энньэ хааҥҥынан бэриллибит информацияны көмөлөһүннэрэн (ийэ куту туһанан)  атаххынан хамсанан, илиигинэн тутан хабан, айаххынан амсайан, муннугунан сытаан,  хараххынан көрөн, кулгааххынан истэн (Буор куккунан) тугу эрэ оҥороҕун.

Бултуугун-алтыыгын, күрүө-хаһаа туттаҕын, сылгы-сүөһү ииттэҕин, оттуугун-мастыыгын, туттар сэпкин-сэбиргэлгин оҥостоҕун.  Ону тэҥэ  кэпсэтэҕин-ипсэтэҕин, ыллыыгын-туойаҕын, хоһоон-ырыа  айаҕын, дьиэ туттаҕын, оҕо-уруу үөскэтэҕин-төрөтөҕүн уо.д.а. биир тылынан олох олороҕун. Тыыннаах эрэ киһи  олох олорор, тэнийэр-ууһуур, айар-тутар, үүнэр-сайдар.  Маны барытын өй-санаа, саҥа-иҥэ, сурук-бичик көмөтүнэн оҥороҕун.

Бастаан дьону кытта кэпсэтэн-ипсэтэн  тугу эрэ толкуйдуугун. Ону оҥорорго сананнаххына, материальнай оҥоһукка кубулутаргар  уруһуй-мээрэй оҥостоҕун, туохтан оҥосторгун, тугу оҥороргун быһаарынаҕын, дьэ уонна оҥостоҕун. Бу оҥоһугу оҥороргор өйгүн-санааҕын (салгын кут), илиигин-атаххын, айаххын, уоскун тиискин, муннугун, хараххын -кулгааххын туһанан (Буор кут) уонна дьэ сатыыр, билбит-көрбүт  ньымаларгын туттан өбүгэлэргиттэн бэриллибит дьоҕургун, сатабылгын (Ийэ кут) көмөлөһүннэрэн,  айан- тутан (Салгын кут), оҥорон, таҥан (Буор кут), уустаан-ураннаан (Ийэ-кут)  таһаараҕын.

Үтүө өбүгэлэрбит 5 көрүүнү-истиини, куолу өйү, өтө көрөр өйү, ону ааһан өндөр өйү туһанан 3 дойду өйдүбүллэрин сөпкө өйдөөн, анааран олохторугар туһанан, олохҥобутугар,  оһуохайбытыгар, тойуктарбытыгар, дьиҥ алгыстарбытыгар, үһүйээннэрбитигэр, остуоруйаларбытыгар, өс хоһоонноругар, сомоҕо-домоҕо, үөрэ-дьүөрэ тылларга, знактарга-символларга, былыргы сурукка-бичиккэ, һиэргэ-туомҥа, туттар тэриллэрбитигэр, аһыыр иһиттэрбитигэр, таҥнар таҥаспытыгар оһуор-бичик оҥорон  хаалларбыттар эбит. Ол билии Ийэ куппутугар угуллан кэлбит. Ону арыйар күлүүс киһи тоҕо бу Орто дойдуга олох олоро кэлэрий диэн ыйытыкка дьиҥ-сөптөөх хоруйу буллаххына кэлэр эбит.   

Буор кутун өллөххүнэ сиргэ төннөр, Ийэ кутун оҕолорун нөҥүө бэриллэн бара турар информация буолар, ол аата Орто дойдуга хаалар. Салгын кут куйаарга барар. Орто дойдуга толкуйдаабыт толкуйун хаалбат, оҥорбут оҥоһуктарын эрэ хаалаллар. Ыллаабыт ырыаларыҥ, суруйбут суруйууларыҥ, айбыт айымньыларыҥ, битийбит битиктэриҥ, туппут дьиэҥ, төрөппүт оҕолоруҥ…

***

Источник – телеграм-канаал @Aartyk.ru

Подпишись на наш канал @Aartyk.ru!

 

Оставить комментарий