Виктор ЕФРЕМОВ кэриэһигэр анаммыт турнирга 254 боксер кыттар
Ньурба биир чаҕылхай киһитэ, аатырбыт боксер Виктор Ефремов саха боксатын аан дойду таһымыгар таһаарбыт дьонтон биирдэстэринэн буолар.
Кини 1980 с. ССРС чемпионатыгар боруонса мэтээли ылан дьонун-сэргэтин үөрдүбүтэ. Эһиилигэр өссө үрдүк үктэлгэ тахсыбыта: Сэбиэскэй Сойууска иккис миэстэ буолбута. Малига, Алжирга, Махачкалаҕа омуктар икки ардыларынааҕы турнирдарга кыайталаан, спорт аан дойдутааҕы кылаастаах маастарын үрдүк аатын ылбыта. Өссө даҕаны үүнүөх-сайдыах, күөгэйэр күнүгэр сылдьар спортсмены, Дьокуускай пааркатыгар сүүрэ сырыттаҕына, ииримтийэ итирбит бандьыыт саанан күүскэ дэҥнээн, улахан спортан тохтообута.
Билигин сыл ахсын чулуу боксер сырдык кэриэһигэр Саха сиригэр 13-14 саастаах уолаттарга бастыыр иһин күрэхтэһии ыытыллар. Бүгүн бу түһүлгэ үһүс күнэ.
19 улуустан уонна киин куораттан 254 эдэр спортсмен мустубут. Виктор Николаевич биир дойдулааҕа, Ньурба тренерэ Айаан Иванов кылгастык маннык кэпсээтэ:
“Бу күрэхтэһиигэ биһиги 23 уолу бэлэмнээн аҕаллыбыт. Улаханнык саҥарбаппын эрээри, билиҥҥитэ этэҥҥэ иһэбит. Аҕыс уолбут финал аҥаарыгар таҕыста, ол аата кинилэр мэтээлгэ тигистилэр”.
В.Н. Ефремов аатынан күрэхтэһии “Триумф” спорткомплекс боксаҕа саалатыгар буола турар. Кыайыылаахтар сарсын биллиэхтэрэ.
***
Гаврил СТРУЧКОВ
Ааптар хаартыскаҕа түһэриилэрэ
Виктор Ефремов -талантливый боксер ,был сильнейшим в Советском Союзе, мог бы стать олимпийским чемпионом , но помешал несчастный случай . В самом расцвете сил в результате преступления получил огнестрельное ранение ноги. Его стиль был больше близок к профессиональному боксу -агрессия , тяжелые удары. Сам он говорил , родился бы чуть позже стал бы профессионалом.