Изабелла МАТВЕЕВА “Алаастар ааннарын аһаммын” кинигэтин сэҥээрии

“Алаастар ааннарын аһаммын” диэн быйыл бэртээхэй хоһооннор хомуурунньуктара таҕыста. Автор Алаас Хотуна – Изабелла Матвеева. Эдэрдиин, кырдьаҕастыын ааҕарга анаммыт олус туһалаах кинигэ. Изабелла Петровна бэйэтэ үрдүк таһымнаах билиилээх учуонай-биолог, хайдах курдук Саха сиригэр үүнэр үүнээйилэри хоһуйан, дьикти кэрэтик дьүөрэлээн таһаарбыта эриэккэс даҕаны.

Ол курдук, кулун туйаҕа, суорат от, силиргэхтээх ача онтон да атын от-мас табыллан хоһуйуллубут. Ити биир үөрэтэр хайысхата. Салгыы ааҕан истэх аайы, чахчы даҕаны төрөөбүт дойдубут – алаас ахтылҕана, кини кэрэтэ, туһата, дьэдьэн сыта, мутукча тыллыыта, түптэ саймаархай буруота, бээгэй ынахпыт маҥырыыра, сылгы кистиирэ, от-мас сиэдэрэй тыллыыта бэрт дьиктитик субу баардыы саха киһитигэр олус чугастык хоуйуллубут, киһи уйан кутун таарыйар.

Айылҕа кэрэ көстүүлэрэ, дьыл уларыйыыта, сибэккилэр, таммахтар ырыалара, бииртэн биир кэрэ хартыына арыллан истэ. Автор саха киһитэ олохсуйан олорор чөл туруктаах, ыраас салгыннаах, тула өттүттэн өссө да ситэ арылла илик туһалаах аар Айылҕабыт барахсан эн, эмиэ ыалдьаҕын киһи курдук диэн хоһуйбута хайа да бэйэлээх киһини уйадытар, уйулҕатын хамсатар, дириҥ толкуйга түһэрэр.

Алаас Хотунугар  Изабелла Петровнаҕа махтанабыт, сүгүрүйэбит, өссө да айа-тута олороргор баҕарабыт. Бу кинигэни кэннибитигэр хаалар кэнчээри ыччаппыт ааҕан-ырытан, дискуссия тэрийэн туһалаах түмүктэри оҥостуон наада эбит диэн түмүккэ кэллим.

***

Диана Чомчоева,

 Кэнкэмэ.