Быыбар түһүлгэтиттэн сонуннар

Халлаан сылыйан, күн уһаан саха дьоно барахсан сирэйдэрин-харахтарын ньухханан, тымныыга хаайтарбыт эттэрин-сииннэрин тыыллаҥнатан сэргэхсийэн эрэллэр.

Аам-даам быыһыгар тугу гыныахпыт баара, устар кыһыны быһа бассаап сонунун мыҥаан, онно эҕэ-дьаҕа буолан күммүтүн барыырбыт. Сатахха бобуу-хаайыы да үтүмэнэ, ойон тура-тура боп да боп, хабахха тыыннарыы, мааскаҕа тууйуу. Биири көҥүллээн абырыахтарын кэриэтэ кэриэс.

Дьаҥ туран таһырдьа буор-босхо күүлэйдиир бобуллубутун кэннэ, аны саха сөбүлээн сылдьар дьарыгыттан –  миитиннэрбититтэн, пикиэттэрбититтэн көрөн олорон маппыппыт,  ыһыахпытыттан олох да ытыс соттубуппут ыраатта. Сайын буолбута этэ дуу, суох дуу диэн таайыы.

Онтон бассаап дьоҕус  дьөлөҕөһүнэн аан дойдуну  анааран тыыммытын таһааран истэхпитинэ аны “куус-маас” тыллаһымаҥ, тойону-хотуну үөҕүмэҥ хаайыыга ыытыахпыт диэн оройго оҕустулар. Сырыһыннара оҕо босуобуйатын массыыналаах, гараастаах буоллаххына биэрбэппит диэн мэлдьэһэн кэбистилэр, ыаммыт үүккэр ыспараапката суох хаччыласпаккын, сүөһүҥ ахсаана аһара дайбаатаҕына бачча хаччыҥ туура тутуллар… Аата барыта аанньа диэн истэхпитинэ, олох да мээрбит сарылаппытынан туран баран хаалла… Инстаграмын эрэ көрөн хааллыбыт.

Ол кэннэ оҕо төрөтөн,  сибиинньэ ииттэн да диэн симмитигэр түһэн истэхпитинэ, хата быыбар буолар үһү диэн олоххо тардыһыыны сахтылар. Уонна “мээр бэйэтин киһитин, эдэр уолу хаалларар” диэн буолла. Тыый… дьэ эрэ. Хантан хааннаах, кимтэн кииннээх уол оҕо буолла, саҥата-иҥэтэ төһө олохтооҕо, ылыннарыылааҕа буолла, тугу үлэлээн-хамсаан айаҕын ииттэн кэлбитэй, үөрэх-тайма ылбытай, оҕо-уруу тэриммитэй? Мантан антах “дьону көрcөн” бүттэҕинэ сыа-сым курдук суруйа түһэр инилэр диэн эрэли кытары көкөллөн олоробут.

Ойоҕос баартыйалар кими тэрийэн-хамыйан быыбар түһүлгэтигэр киллэрэллэрин эмиэ, оттон, күүтэн-көһүтэн төбүрүөннээн олоробут. Оонньуу буолан баран күүрүүлээх күрэстэһиилээх, киирсиилээх, тибийсиилээх буоллар сэргэхситиэх этэ ээ.  Эргитэ сылдьан биир бөҕөһү көрөр, сыаналыыр сылаалаах, салгыылаах соҕус буолуо диэн истэхпитинэ, арай кыһыл муннуктан хомуньуус баартыйа ылгын уола Сааба Мэхээлэйэп диэммин диэн баран биир уол сулбу ойон  таҕыста. Туох да бугуһуйа сылдьар.

Тустуук уолтан биирдэстэрэ, хоту хоһууна Малардыырап аҥаара мээр дуоһунаһыгар киирсиэн баҕарар үһү диэтилэр. Чэй эрэ.  Аны туран хаһан эрэ Мэхээлэ бэрэсидьиэн хонноҕун анныгар сылдьан “Саха-ипотечнай ааҕыныстыба” диэни тэрийбит Мээрикээнэп Миисэ “Сомоҕоттон” турабын диэн ох курдук оҥостор сурахтанна.  Заболотнай Мэкээлэ диэн тэлэбииһэртэн чоргуйар омук уола олох арахсыбакка турабын диэн суруналыыстарга биллэрбит. Туох да ыһыахтан, көртөн-нартан маппыт дьоҥҥо быыбар диэн бэйэтэ туспа аралдьыйар-саатыыр түһүлгэ буоллаҕа.

Бүгүн аны “куорат уола Болуодьа Һүөдэрэп” мээргэ киирсэбин диэн биллэрбитигэр дьахтар аймах уҥа сыспыт. Уҥа-хаҥас дайбаһарга сарсын да бэлэммин диэбит. Инстаграм уруй-айхал бөҕө буолбут, сырыһыннара кэтэххэ охсооччулар эмиэ баар буолбуттар.

Дьэ, ноколор, онон оллоонноон олорон өссө тугу көрөбүт-истэбит диэн кулгаахпытын чөрөтөн олордохпут. Боппотохторуна аны да быыбар түһүлгэтиттэн быһа эпииргэ тахсар инибин диэн мүчүк гыныахха.

***

Бүөтүр АРЫЫЛААХАП,

Aartyk.Ru