Бүлүү улууһугар ытык сиргэ сыбаалка оҥорору утаран оройуон депутаттара Аһаҕас илдьит ыыталлар

Кэрэ көстүүлээх ытык сири бөх-сах, кир-хох тоҕор полигон оҥорору утаран Бүлүүгэ Чернышевскай нэһилиэгин олохтоохторо кулубаларын Сергей Винокуров дьаһалын утарбыттара икки сыл буолла. Оройуон депутаттара республика салалтатыгар туһаайан сурук ыыттылар.

Республика Баһылыга, Ил-Дархаҥҥа,

А.С.Николаевка.

КӨҤУЛ АҺАҔАС ИЛДЬИТ!!!

Убаастабыллаах Айсен Сергеевич!

Истэ-билэ сырыттаҕыҥ, хайдах курдук кэнники икки сыл устата Сэттэминнээх ТКО полигонун туруохтаах сирин талыыга Чернышевскай нэһилиэгин дьонун-сэргэтин этиитин Бүлүү улууһун дьаһалтата (баһылык Винокуров С.Н.) ылыммакка, киэҥ өрүттээх бырачыастыыр акциялар бара туралларын!

Итинтибит силиһэ-мутуга дириҥээн, ыыра ыраатан, Айылҕа харыстабылын уонна ЖКХ министерстволара сыылба сыһыаннарын түмүгэр, эрдэттэн ылсыбаккалар уонна Саха Сирин Правительствотын отчуоттарыгар нэһилиэк бүттүүнүн этиниитигэр суолта бэриллибэтэҕиттэн, Саха Сирин уонна Бүтүн Россия общественноһын хараҕын далыгар быраҕыллан эрэр. Бу туруулаһыы глобальнай сир ийэни харыстыыр тэрээһиннэри таарыйарынан сотору Аан дойду иһитиннэрэр-биллэрэр органнарын ситимигэр таҕыстаҕына да көҥүлэ, оччоҕуна тыын суолталаах федеральнай, национальнай, экологическай программа ханнык эрэ муниципальнай чиновник норуотугар көнтөрүк сыһыаныттан туолбат кутталланар!

Истэр-билэр тухары, “үрүҥ” уонна “хара”, көҥүл санаа уонна ньүкэн быҺыы охсуһуутунан олохпут салайтарара чуолкай.

Өксөкулээх Өлөксэй маннык кэмнэргэ сөптөөх аартыгы булунарга бэртэээхэй да ыйар сулус торумнарын кэс тылын быһыытынан, хаалларбыт эбит.

Ол сиэринэн күннээҕи олоххо син биир хараҥа баһыйар, онтон олох обургу устан истэ́ҕин аайы ону үлтүрүтэ ньиккэрийэр, кырдьык кыайар. Сип-сибилигин даҕаны оннук көҥүл, сырдык, ыраас олох туһугар охсуһуу тохтообокко бара турар.

Хайдах буолбут киһи көҥүл санаа ыйар сулуһа буолбут Улуу Чернышевскай аатын сүгэр нэһилиэгэр, Улуу Сталинныын бииргэ автономия ылар туһугар наркомнацка “Якутскай отделы” тэрийбит Степан Максимович Аржаков аатын сүгэр ПК Сэттэминнээх алааһын сайылыгын, Улуу новатордар Таппагаров Н.С.,Социалистическай Үлэ Геройа П.И.Протопопов онтон да атын мургун-туруу холкуостаахтар уонна Степан Аржаков аатын сүгэр совхоз рабочайдара үлэлээбит-хамсаабыт сибэтиэй бааһына-ходуһаларыттан, былыр-былыргы ыраахтааҕы саҕаттан дьаам суолун, билиҥҥитэ республика киин куоратыгар бүтүн Бүлүү түбэтин биэс улууһа Дьокуускайдыыр транспортной-логистическай суолун аартыгар, ону кытта бүтүн республиканскай ыһыахтар уонна өбүгэ үгэстэрин тилиннэрэр сыаллаах муҥхалар ыытыллар ытык сирдэрэ – Сэттэминнээх алааһыттан 700 метрдээх сиргэ, Россия судаарыстыбатын императрицата уонна Англия королевствота туттарбыт “Сестра милосердия Кэтти Марсден аатын сүгэр психоневрологическай интернаттан” аҕыйах километрдаах ЫТЫК СИРГЭ полигон ТКО туттарарга сананыай?

Маны эттэригэр-хааннарыгар культурнай уонна духовнай нэһилиэстибэ быһыытынан иҥэриммит чинэкэлэр, сосновкалар, өкүндүлэр сөпкө ыйыталлар: “ТОҔО уонна ТОҔО?” – диэн.

Убаастабыллаах Айсен Сергеевич! Маннык ыйытыыны биһиги – Бүлүү оройуонун сэбиэтин депутаттара интернет социальнай ситимнэр нөҥүө эйигиттэн ыйытабыт уонна полигон ТКО тутуллуохтаах сирин атын туора сиргэ көһөттөрөргөр ирдэһэбит!

***

Бүлүү оройуонун сэбиэтин депутаттара:

В.Тимофеев,

И.Григорьев,

И.Акимов,

Е.Чиряев,

Г.Наумов,

А.Степанов,

Ю.Тутукаров,

Т.Фомина,

П.Томская,

Л.Софронеева,

К.Корякина,

И.Нифонова,

В.Мандаров,

А.Иванова,

Вл. Афанасьев,

Н.Семенов,

В.Афанасьев.