Былаас сыаната

Быйыл республика ситэриилээх былааһын хамнаһыгар, айаныгар хаһааҥҥытааҕар да элбэх үп республика бюджетыттан ороскуоттаммыт — 10,67 миллиард солкуобай.

“Ил Дархан Егор Борисов саҕана бу ороскуот 3 миллиардынан кыра этэ. Эһиил салалта үлэтигэр-хамнаһыгар быйылгытынааҕар 6,86 миллиардынан “кыра” үп көрүллүбүт эрээри, ити суумма көннөрүллэн үллүөн сөп”, – диэн News.Ykt.Ru суруйар

Ил Дархан уонна правительство дьаһалтатыгар (АГИП) 224 чиновник үлэлиир, салайааччылара Афанасий Владимиров, кини икки солбуйааччылаах — Елена Кузнецова (бастакы) уонна Михаил Гасанбалаев (көннөрү солбуйааччы). АГИП чиновниктарыгар бюджеттан бу сылга миллиард аҥаарыттан тахса, о.э. 545 мөлүйүөн солкуобай ороскуоттаммыт.  Киһитигэр таһаардахха – сылга биир чунуобунньукка 2,4 мөлүйүөн бараммыт (ыйга ортотунан 200 тыһ. курдук).

2021 сылга Айсен Николаев уонна кини аппараатын үлэһиттэригэр –  159,7 мөлүйүөн көрүллүбүт.  Ол суумматтан  5,881 мөлүйүөнэ быһаччы республика бастакы сирэйин үлэтин толороругар баранар диэн  отчуоттууллар эрээри, Николаев сыллааҕы дохуотун декларациялыырыгар  8-8,7 мөлүйүөнү көрдөрөр, онон эбии өссө хантан эрэ хамнастанар быһыылаах диэн суруналыыстар сабаҕалыыллар. News.Ykt.Ru суруйарынан, Айсен Николаев ыйдааҕы хамнаһа ортотунан  490 тыһ. солкуобай.  Былырыын быһа эфиргэ дьон Николаевтан хамнаһыҥ төһөнүй диэн ыйыппыттарыгар 270 тыһ. диэбиттээх.

***

Саха республикатын ситэриилээх былааһыгар  19 министерство; 3 государственнай кэмитиэт; Владивостокка уонна Москваҕа 2 бэрэстэбиитэлистибэ;  4 управление, 2 департамент, мировой судьуйалар уонна олор аппарааттара киирэллэр. Бу былаас салаалара бары тус-туһунан бюджеттээхтэр.

Үөһээ салалтаны – правительство бэрэссэдээтэлин, солбуйааччыларын, аппарааттарын үлэһиттэрин АГИП нөҥүө үбүлүүллэр. Ол сыалга  эһиил республика бюджетиттэн   291,62 мөл. солк. көрүллүбүт.

Андрей Тарасенко, Дмитрий Бердников уонна Кирилл Бычков

Правительство бэрэссэдээтэлэ  Андрей Тарасенко алта солбуйааччылаах. Онтон түөрдэ бастакы солбуйааччылар – Кирилл Бычков,  Алексей Колодезников, Андрей Федотов уонна Дмитрий Бердников.  Бу сэттэ киһи үлэтигэр-хамнаһыгар эһиилги бюджеттэн 23,12 мөл. солк. тыырыллдыбыт. Ол аата ортотунан, бу дьон ый ахсын бюджеттэн 275 тыһ. солкуобайы барыыр буолан тахсаллар.

***

Ил Дархан уонна правительство дьыалатын управлениета (Управделами ГиП) эмиэ бюджеттэн туспа ыстатыйанан үбүлэнэр. 2021 сыллааҕы үбүлэниитэ – 816 мөлүйүөнтэн тахса.  Ити суумматтан аҥардас 15,37 мөл. солкуобайа Ил Дархан айаныгар ороскуоттанар.

Боростуой киһи эконом-кылааһынан көттөҕүнэ Дьокуускайтан Москваҕа диэри 800-чэкэтэ айанныан сөп диэн ыстатыйа ааптара ааҕар. 

***

Управделами бюджетиттэн судаарыстыбаннай сүбэһиттэр эмиэ хамнастаналлар: Андрей Борисов, Вячеслав Штыров уонна Михаил Николаев. Кинилэргэ уонна кинилэр сэкиритээрдэригэр, көмөлөһөөччүлэригэр эһиил 29,8 мөл. солк. көрүллүбүт.

СР Общественнай палататын үлэтигэр сылга  7,33 мөл. солк. тыырыллар.

Муниципалитеттарга баар административнай хамыыһыйаларга 52,3 мөл. солк.; киин куорат историческай-архитектурнай памятнигын харайарга 17,76 мөл. солк. бараныаҕа.

***

Ил Түмэн депутаттарыгар, аппараатыгар 2021 сылга 335,3 мөл. солк. ороскуоттаныахтаах, ол иһигэр спикер Петр Гоголевка – 4,95 мөл. солк., хамнастаах депутаттарга – 61,88 мөл. солк. 

Саха республикатын Счетнай палататын үлэтигэр-хамнаһыгар  –  85 мөл. солк. барыаҕа.

Москватааҕы постпредствоҕа (Андрей Федотов сал.) баһаам харчы ылар эбит — 172,8 мөл. солк.  (биэдэмискэ көстөрүнэн, итиннэ эбии 55 мөл. солк. баар). Сахапостпредство аппараатын үлэтигэр-хамнаһыгар — 71,95 мөл. солк. ороскуоттанар. Хаалбыт 100-тэн тахса мөлүйүөнэ Ил Дархан уонна да атын тойон-хотун Москваҕа сылдьарыгар, сыаналаах массыынаҕа тиэллэригэр туттуллар.

По данным на конец 2019 года, глава республики передвигался по Москве на Mercedes-Benz Maybach X222 S-Class S560 4matic 2018 года выпуска. Рыночная стоимость такого авто составляет около десяти миллионов рублей.

Онуоха холоотоххо Дальнай Востокка баар Саха сирин бэрэстэбиитэлистибэтэ республика бюджетыгар олус “ноҕурууската” суох, сыллааҕы үбүлэниитэ – 21,9 мөл. солк.

СР Киин быыбардыыр хамыыһыйатын (ЦИК) салайааччытынан соторутааҕыта Евгений Федоров анаммыта. 2021 сылга бу структура – 75,2 мөл. солкуобайга үлэлиэҕэ.

Ил Дархаҥҥа баар Антикоррупционнай управление 2021 сылга  34,12 мөл. солк. бюджеттэн ылыаҕа.

Кырата 200-чэкэ хамнастаах үрдүк сололоохтор 15-20 тыһ. солкуобай пенсиялаах норуоту өйдүүрэ уустук. Хата сүрэҕэ суоххутугар маннык олороҕут диэн мөҕөн биэриэхтэрэ.

***

News.Ykt.Ru материалыттан кылгатыллан тылбаастанна