Биэс киһи “Ньурба оройуонун Бочуоттаах гражданина” буолла

«Ньурба оройуонун Бочуоттаах гражданина» үрдүк аат биэс биир дойдулаахтарбытыгар иҥэрилиннэ, диэн лууус пресс-сулууспата биллэрэр.

Бэс ыйын 30 күнүгэр дьоллоох Дьокуускай киинигэр, Степан Васильев пааматынньыгын аттыгар сэргэх тэрээһин буолла. Бу куйаас сайыҥҥы күн «Ньурба оройуонун Бочуоттаах гражданина» аат бэлиэлэрин биир дойдулаахтарбыт «Ньурба оройуона» МО баһылыга Алексей Михайлович Иннокентьев илиититтэн үɵрэ-астына туттулар.

Ол курдук, СƟ Ньурба оройуонун Сэбиэтин 2021 сыл бэс ыйын 23 күнүнээҕи 4РРС-6№ быһаарыытынан, «Ньурба оройуонун Бочуоттаах гражданина» үрдүк аат бэлиэлэрэ:

СƟ физическэй култууратын уонна спордун туйгунугар, СƟ үтүɵлээх тренеригэр Бурцев Петр Иннокентьевичка;

Ньурба куорат Бочуоттаах гражданиныгар, СƟ ыччат политикатын туйгунугар, СƟ үтүɵлээх ветеринарнай бырааһыгар Дмитриев Сергей Гаврильевичка;

Мэҥэдьэк нэһилиэгин Бочуоттаах гражданиныгар, СƟ култууратын туйгунугар, СƟ бэчээтин туйгунугар, СƟ норуот хаһаайыстыбатын үтүɵлээх үлэһитигэр Егоров Август Васильевичка;

СƟ үтүɵлээх бырааһыгар, РФ доруобуйатын харыстабылын туйгунугар Копылова Любовь Николаевнаҕа;

Меценакка, Бочуоттаах урбаанньыкка Петрова Эльвира Семеновнаҕа.

Эҕэрдэ тылларын кинилэргэ Ньурба оройуонун баһылыга Алексей Михайлович Иннокентьев, Дьокуускай куоракка Ньурба улууһун түмсүүтүн салайааччыта Аркадий Филиппович Саввинов уо.д.а. эттилэр.

Хардатыгар наҕараадаламмыт дьон иһирэх махталларын биллэрдилэр.

«Тɵрɵɵбүт дойдубут туһугар ɵссɵ күүскэ үлэлиэхпит», – диэн Эльвира Семеновна эрэннэрдэ. Оттон Август Васильевич Саха Ɵрɵспүүбүлүкэтигэр от ыйын 1 күнүгэр бэлиэтэнэр национальнай бэчээт Күнүн иннинэ дойдутун дьонуттан саамай үрдүк уонна сыаналаах наҕарааданы туппутун эттэ. Ону кытта кини Дмитриев Сергей Гаврильевичтыын, оскуолаҕа биир кылааска үɵрэммит доҕорун кытта, бочуоттаах ааты биир күн тэҥҥэ сүкпүт үɵрүүлэрин үллэһиннилэр.

Бары наҕараадаламмыттар Ньурба оройуонугар биллэр судаарыстыбаннай, уопсастыбаннай уонна политическэй диэйэтэллэр Степан Васильевич Васильев тɵрɵɵбүтэ 125 сыла уонна Варвара Андреевна Петрова тɵрɵɵбүтэ 85 сыла бэлиэтэнэр ураты сылга улуус Бочуоттаах гражданинын аатын ылбыттарын ордук долгутуулаах буолбутун бэлиэтээтилэр, диэн олохтоох дьаһалта иһитиннэрэр.

***

Aartyk.Ru