Ыччат сүөhүну уотуу – кэскиллээх дьаһаныы

Бу сыл “Туймаада Агрохолдинг” ААУо бөдөҥ тэрилтэлэр бөҕө туруктаах, кыахтаах тэрилтэлэр буолалларын тэрийиинэн эрэ дьарыктаммакка тыа сирин нэһилиэнньэтэ дьарыктаах уонна дохуоттаах буоларын ситиһэр сыалтан улуустарга сүөһү иитиитинэн дьарыктаныан баҕалаах биирдиилээн дьоҥҥо уонна хаһаайыстыбаларга сөбүлэҥ быһыытынан уотууга 19-20 сыллаах төрүөх ыччат сүөһүнү туттартаабыт.

Бу кэскиллээх дьыалаҕа уопсайа түөрт хаһаайыстыба Намтан ИП Новгородов 50 уонна Протопопова хаһаайыстыбата 20 төбө ыччат сүөһүнү ылан уотууга үлэлэһэ олороллор. Онтон Тааттаттан Афанасьев Д.Е. салайар бааһынай хаһаайыстыбата 70 ыччат сүөһүнү уота сылдьар. Манна Чурапчыттан Адамов А.Е. киллэриэххэ сөп. Кини бэйэтин кэмигэр аатырбыт бааһынай хаһаайыстыба салайааччыта Адамов Е.Е. уола. Онон кини аҕатын туйаҕын хатаран ынах сүөһүнү үөскэтэр санаалаах өссө былырыын Сахаплемхолбоһуктан 50 ыччат сүөһүнү ылан ииппитэ. Ыччат сүөһүнү сүрүннээн “Туймаада Экоферма” ХЭТ ыйыллыбыт хаһаайыстыбаларга биэрбитэ.

Сөбүлэҥ быһыытынан хаһаайыстыбалар уонна биирдиилээн дьон сүөһүнү 18 ыйга уотууга ылаллар. Онно хас биирдии төбө аайы 160 киилэ комбикорм көрүллэр. Сөбүлэҥҥэ ыйыллыбыт кэм бүтүүтэ сүөһү улаатыытын хас биирдии киилэтигэр кэпсэтии быһыытынан ыйыллыбыт харчы төлөнөр. Ону таһынан уотууга бэриллибит ыччат сүөһү уопсай ахсааныттан 25 бырыһыана хаһаайыстыбаҕа хаалыан сөп. Онон сүөһү ылан ииттиэн баҕалаахтар бу тэрилтэни булан билсиэххитин сөп.

***

Прокопий ХАБАРОВ