Уус-алдаҥҥа Республика күнүн чэрчитинэн Василий Леонтьев төрөөбүтэ 130 сылыгар тэрээhиннэр

Хайа баҕарар норуот дьылҕата биирдиилээн күүстээх личностар үлэлээн-хамсаан, история киэҥ хонуутугар суол-иис хаалларан ааһыыларын кытта быстыспат сибээстээх. Ол эрээри, ардыгар араас биричиинэлэринэн сорох сүдү дьоннор ааттара-суоллара, үлэлэрэ умнуллар, бэл диэтэр, «кистэнэр». Саха дьонугар даҕаны ити баар суол. Ордук арылхайдык бу маннык быһыыны-майгыныВ.В. Никифоров-Күлүмнүүр үтүө аатын «тилиннэрии», норуотугар төнүннэрии хас да уон сыл барбыта көрдөрөр.

Биһиэхэ, сахаларга, XX-с үйэ саҕаланыыта В.В. Никифоров-Күлүмнүүр, А.Е. Кулаковскай-Өксөкүлээх Өлөксөй, П.А. Ойуунускай, М.К. Аммосов о.д.а бөдөҥ государственнай, политическай, общественнай деятеллэр ааттарын кытта сибээстээх. Оннук дьоннортортон биирдэстэринэн саха тыллаах дьон бары ытыктыыр сүдү киһибит В.Н. Протодьяконов “Ойуунускай, Омуоһап, Бараахап таһымнарынан олорон ааспыт киһи” диэн эппит киһитинэн Василий Никанорович Леонтьев буолар. Хомойуох иһин, кини туһунан биһиги билиибит бэрт кэмчи, дьон үксэ билбэтдиэххэ сөп.

Быйыл Василий Никанорович Леонтьев төрөөбүтэ 130 сылыгар биир дойдулаахтара, уус-алданнар, улуу өбүгэлэрин үтүө аатын киэҥ эйгэҕэ билиһиннэрэргэ сыал-сорук туруорунан үгүс тэрээһиннэри былааннаабыттар, улуус баһылыгын дьаһалынан анал хамыыһыйа тэриллибит. Василий Никанорович күн сирин көрбүт күнүгэр, кулун тутар ыйыгар, кини олоҕун уонна үлэтин кэпсиир киэҥ ис хоһоонноох выставка туруоруллубута, бэчээккэ ыстатыйалар тахсыбыттара.

Онтон бүгүн, муус устар 25 күнүгэр, Саха Республикатын күнүн көрсө II-с Лөгөй орто оскуолатыттан сферум платформанан Уус Алдан улууһун бары оскуолаларын оҕолорун, учууталларын хабан ХХ үйэ саҕаланыыта Саха сирин маҥнайгы общественнай деятеллэриттэн биирдэстэрэ, сахаттан маҥнайгы литературнай критик, “Саха омук” культурнай-сырдатар общество тэрийээччи уонна салайааччы, 1923-1928 сылларга Саха АССР Юстициятын наркомун солбуйааччы. 1922-1927 сылларга ыытыллыбыт Советтар Бүтүн Саха сиринээҕи I, II, III, IV съезтэрин делегата, Саха Киин ситэриилээх комитетын чилиэнэ. 1924-1926 сыллардаахха Саха АССР маҥнайгы Конституциятын бырайыагын оҥорор комиссия салайааччыта Василий Никанорович Леонтьевка аналлаах библиотечнай урок буолла.

Бу тэрээһиҥҥэ улуус баһылыгын солбуйааччы А.Д. Сторожев, улуустааҕы үөрэх управлениетын начальнига С.М. Литвинцев, начальник солбуйааччыта Л.К. Дегтярева, улуустааҕы кииннэммит библиотека тиһигин
директора И.Д. Копырин, С.С. Васильев-Борогонскай аатынан Бороҕоннооҕу
модельнай библиотека краеведческай отделын сэбиэдиссэйэ О.Н. Павлова, Сэһэн Аржаков аатынан история түмэлин научнай сотруднига З.М. Белолюбская, нэһилиэк баһылыга П.Е. Бурнашев кыттыыны ыллылар.

Урок устата оҕолор Ольга Николаевна, Зоя Михайловна бэсиэдэлэриттэн Василий Никанорович кылгас эрээри чаҕылхай олоҕун, үлэтин-хамнаһын кэрдиис кэмнэрин кытта билистилэр. Сонун көстүүнэн урукку өттүгэр биллибэтэх, сурукка-бичиккэ киирбэтэх Саха Республикатын Национальнай Архивыттан булуллубут докумуоннар сырдатыллыылара буолла. Биир дойдулаахпыт олоҕун, үлэтин үөрэтии элбэх чинчийиини, үөрэтиини эрэйэрин, онно ыччаттар ылсыахтарыгар баҕа санаа этилиннэ.

Түмүккэ, Василий Никанорович төрөөбүтэ 130 сылыгар анаммыт тэрээһиннэртэн билиһиннэрдэххэ, кини туһунан бэчээккэ буклет, брошюра   улуустааҕы библиотека уонна түмэл үлэһиттэрин күүстэринэн бэлэмнэммиттэр, онон бу күннэргэ Саха АССР төрүттэспит саха биир чулуу киһитин туһунан биир дойдулаахтара билсэр кыахтаныахтара. Ону таһынан бу сайын Василий Никанорович төрөөбүт дойдутунан ааҕынар Тулунатыгар В.Н. Леонтьев аатыгар анаммыт ыһыах ыһыллыахтаах.

***

Ольга Павлова