Курс валют
$
87.37
0.59
94.08
0.18
Курс валют
Курс валют
$
87.37
0.59
94.08
0.18
Меню
Поиск по сайту

УЙУЛҔАЛААХ ЫРЫАҺЫТ CАЙНААРА КУО

03.06.2024 (4 недели назад) 08:10 0
УЙУЛҔАЛААХ ЫРЫАҺЫТ CАЙНААРА КУО

Нарын-намчы куоластаах Сайнаара Куо чараас уйан дууһата оҕо эрдэҕиттэн ырыа эйгэтигэр тардыһар эбит. Ол эрэн чугас дьонноруттан бу ыраас иэйиигэ тардыһыытыгар өйөбүл булбакка, өр сылларга ыра санаатын хам баттаан сылдьыбыт.

Дьиҥэ, дьонноро эмиэ, оһуоба аҕатын өттүттэн, ыллыыр талааннаах эбиттэр да, ким да улаханнык ырыаны өрө туппатах, чолбон сулуһа оҥостубатах, ырыаҕа дьылҕатын анаабатах. Сайнаара эмиэ ол суолу батыспыт.

Оскуолаҕа үөрэнэ сылдьан техническай предметтэргэ ордук охторо, ол да буоллар кистээн дууһата иэйэринэн хоһоон, ырыа, кэпсээн, остуоруйа айар эбит.

Олоҕун промышленноһы кытары ситимнээн хамнастаах үлэһит буолаары, ХИФУ-га киирэн инженер-технолог идэтин баһылыыр. Үөрэҕин бүтэрэрин диэки салгыы аспирантураҕа үөрэнэргэ этии киирбитин ылыммат.


Талбыт идэтинэн үлэлиирэ эмиэ сатаммат буолан тахсар. Дипломнайын “Тымныыга сыстар тутуу матырыйаалын килиэйэ” диэн темаҕа суруйар, онно практикалана сылдьан сүрүн туттуллар матырыйаалыттан цементан аллергиялыыра биллэр. Бу гынан үөрэҕин бүтэрэн баран репетиторствонан, оҕолору научно-практическай конференцияларга бэлэмнииринэн, проект суруйарынан дьарыгырар.

2019 сылаахха ис талаанын арыйбатах содулугар, олоҕор ыарахаттары көрсөр. Таптыыр киһитин кытары арахсар, дьонунаан тапсыбата үксүүр, эбиитин иэс-күүс бөҕөҕө киирэр. Бу сырыттаҕына дьылҕата нумерология диэки хайыһыннарар.

Дьоҥҥо төрөөбүт чыыһылаларын уонна ааттарын дьүөрэлии тутан, суоттаан, дьылҕаларыгар туох уларыйыы кэтэһэрин, туохха талааннаахтарын, туохтан сэрэнэн-сэрбэнэн сылдьыахтаахтарын, тугу батыһыахтаахтарын ыйан-кэрдэн биэрэр.

Сыыйа-баайа улахан дьоҥҥо аат уларытыыга, кыра оҕолорго аат иҥэрэргэ сүбэ-ама биэрэр буолар. Манан дьарыгырбыта номнуо биэс сыл буолбут эбит. Бу мантын олус сөбүлүүр, дьоҥҥо-сэргэҕэ туһаны аҕаларыттан дуоһуйар.

Тус бэйэтин нумерологиянан эмиэ көрүнэр эбит, бэл бэйэтин аатын эмиэ уларытар. Төрүөх аата – Степанида, аҕата кэргэнэ, оҕото суох эдьиийин аатын иҥэрбит эбит. Сайнаара диэн ааты ылыныаҕыттан ыла, тус олоҕор табыллыы, бэйэни ылыныы кэлэр. Сайнаара билигин икки уол оҕо амарах ийэтэ, таптыыр уонна таптатар кэргэн. Толору дьоллонуон оҕо эрдэҕинээҕи баҕа санаатын эрэ толоруон хаалар.

Быйылгы тус бэйэтин нумерологията туоһулуурунан, киниэхэ 2024 с. ыллыыр дьоҕурун аһарыгар, сайыннарарыгар табыгастаах кэм үүнэр диэн тахсар. Сайнаара баччаны билэн баран олорон биэрбэт. Сахабыт сиригэр биллэр-көстөр ырыаһыт Дария Лаврова айар-тутар студиятыгар вокалга үөрэнэ киирэр.

Кыргыттар ыккардыларыгар истиҥ сыһыан үөскүүр, Сайнаара үрдүк сыанаҕа тахсан дьон иннигэр ыллыан баҕарарын Дариялыын үллэстэр. Биирдэһэ: “Тоҕо сатаныа суоҕай?” – диэн турар. Сайнаара учуутала киниэхэ эрэнэриттэн кынаттанан, олорор нэһилиэгэр Хатаска бастакы сольнай кэнсиэрин туруорарга сананар.

Кэнсиэр бэс ыйын 8 күнүгэр Хатас нэһилиэгин култууратын киинигэр буолар. Көрөөччү дьүүлүгэр талааннаах ааптар бэйэтин истиҥ-иһирэх, ылбаҕай ырыаларын таһаарыа. Уйулгулаах ырыаһыт Сайнаара Куо ырыалара бэйэҕэ таптал, махтал, сылаас сыһыан туһунан буолаллар уонна истээччини уоскутар, нус-хас түһэрэр терапевтическай дьайыылаахтар. Маны таһынан кэнсиэргэ угуйааччыта Дария Лаврова, Николай Андросов, Эрчим, Анатолий Горохов, «Кэрэ Куо» уонна «Кэрэли» бөлөхтөр кыттыыны ылыахтара.

Маннык этэн туран, Сайнаара Куо ааҕааччыларыгар самаан сайын салаллан кэлбитинэн истиҥ-иһирэх эҕэрдэтин тиэрдэр. Барыгытыгар дьолу-соргуну, тапталы, өйдөһүүнү, өйөһүүнү уонна хайаан да ис сүрэххит тугу этэрин истэ, иһиллии сылдьаргытыгар баҕарар.

***

Анжелика МОТОСОВА

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»