Удьуор уус дьарыгын идэ гынан

Хаҥалас нэһилиэгин талааннаах ууһа, СӨ уонна Ньурба улууһун норуотун маастара Афанасьев Ариан Васильевич-Арыйаан Уус 1994 с. Ньурба талба талааннаах ууһугар Евгений Ионовичка көмүс оҥоһугу оҥорорго үөрэммитэ.

Үрүҥ, кыһыл көмүһүнэн дьахтар симэҕин оҥорон саҕалаабыта. Онтон тимиринэн уһаммыт киһи диэн санааҕа киирэн, өбүгэлэрбит Сата уустарын дьарыктарын сөргүтэн тилиннэрэргэ санаммыта.

2015 с. улууска киирэн бырайыак көмүскээбитэ, манна култуура управлениетын начальнига Л.Р. Степанова өйөбүлүнэн 50 000 Грант ылан, онтон кынаттанан үлэтин саҕалаабыта. Туох барыта саҥа саҕалааһын, сонун дьарык буолан, бары түмсэн бииргэ ылсыбыппыт.

Аан бастакы тимири уһаарыы 2016 с. атырдьах ыйыгар буолбута. Саҥа ууһу, саҥа уһаарыыны өйөөн Саха Сирин биллэр уустара кэлэн сүбэһит, өйөбүл буолбуттара.

Сата уустара бүтэһигин уһаарбыттарын кэннэ 80-ча сыл буолан баран Хаҥаласка бастакы болгуо тахсыыта барыбыт өрөгөйө, умнуллубат өйдөбүлэ буолан сылдьар.

Ити бастакы уһаарыыттан кынаттанан Арыйаан Уус тиһигин быспакка хорутуулаахтык үлэлээн кэллэ. Кэнчээри ыччаттары, оскуола оҕолорун уус идэтигэр уһуйда. Ньурба улууһун уустарын Ассоссацията бүтүн өрөспүүбүлүкэҕэ, Арассыыйаҕа тиийэ ааттара-суоллара тарҕанна.

Удьуор уус дьарыгын идэ гынан уһана сылдьар уолаттарбытыгар Арыйаан Ууска, Барыыс Ууска, эдэр ууска Ньукулай Уйбаныапка үрдүк ситиһиилэри, доруобуйаны баҕарабыт!

***

В.А.Петрова аатынан кыраайы үөрэтэр түмэл