Тымныы сыһыан

Бары билэрбит курдук элбэх ыалга арахсыы боппуруоһа сытыытык турар. Кэмигэр кэпсэппэккэ, быһаарсыбакка, өйдөспөккө икки дьон олохторо арахсарга тиийэр. Итинник быһыы-майгы үгүс ыалы таарыйбыт буолуохтаах. Ол курдук киһини толкуйга түһэрэр  режиссер Степан Бурнашев “Биһиги кыһыммыт” диэн саҥа киинэтин аһаҕас публикаҕа таһаарда. Премьератыгар сэтинньи 14 күнүгэр суруналыыстары, блогердары, табаарыстарын ыҥыран көрдөрдө.

Киинэҕэ сылдьыбыт инженер-строитель Саргылана Лукина санаатын үллэстэр:

“Бэҕэһээ “Биһиги кыһыммыт” диэн Степан Бурнашев саҥа киинэтигэр сырыттым. Киинэҕэ хас биирдии ыал күннээҕи олоҕун-дьаһаҕын, проблемаларын, бэрт өйдөнүмтүө, боростуойдук тиэрдиллибит дии санаатым. Хас биирдии ыалга баар сыһыан, кырдьыктыы, ис-иһиттэн көрдөрүллүбүт. Үчүгэйэ диэн биир эрэ ыалынан муҥурдаммакка, хас да ыал олоҕун тэҥҥэ хайдах ааһарын көрдөрөр хартыына буолан тахсыбыт. Философскай көрүү эмиэ баар диэн бэлиэтээн көрдүм: “Эн бу дойдуга соҕотох кэлэҕин уонна аннараа дойдуга соҕотох бараҕын”. Ол иһин бу орто дойду туох баар үчүгэйин, үүтүн-сүөгэйин, сүмэтин туһанан, ол дьолу билэргэ кимниин эрэ үллэстэргэр аттыгар чугас доҕор, атах тостор атас наада диэн өйдөөн көрдүм.

То5о “Биһиги кыһыммыт” диэн аатаммытын толкуйдаан көрөн баран дьэ биллим – тоҕо диэтэр кыһын тымныы, чысхааннаах, туманнаах. Ол курдук бу дьон сыһыана эмиэ тымныйбыт, туманнырбыт, сүрэхтэрэ мууһурбут. Ол да иһин киинэ улахан аҥара барыта кыһыҥҥы бириэмэни көрдөрөр эбит. Киинэ сюжеттара барыта олоххо баар кырдьыгы көрдөрөрүнэн киһини тардар. Мин киинэ көрө олорон бу дьиҥнээх олоҕу көрө олоробун дии санаабытым.

Артыыстар оонньууллара астыннарар уонна итэҕэтэр. Онтон режиссер, сценарист үлэтэ олох үрдүк таһымнаах, табыллыбыт. Бу киинэ тахсарыгар турууласпыт дьоҥҥо, уһуллубут артыыстарга, үлэлэспит хамаандаҕа махтал буоллун, дьэ дьиҥ киһи дууһатын, кылын таарыйар, сүрэҕин-быарын ортотунан киирэр бэрт боростуойдук, өйдөнүмтүө киинэ оҥорон таһаарбыккытыгар”.

“Итинник “тымныы” кэмнэр хас бирдии дьиэ кэргэни таарыйара буолуо, киинэни көрөн баран, элбэх ыал бэйэ бодотун тардынан,  сыһыаннарын толкуйдаан тупсарыахтарын сөп диэн түмүккэ кэллим” – диэн атын көрөөччү Настя Иванова суруйар.

“Биһиги кыһыммыт” сценарийын суруналыыс, блогер Светлана Тайко суруйбут эбит. Киинэ сүрүн оруолун Саха Академическай тыйаатыр артыыһа Ирина Михайлова уонна Үүнэр көлүөнэ тыйаатырын артыыһа Илья Яковлев ооньообуттар.

Киинэни 2021 сыл иннигэр тыйыс тымныыларга устубуттар. Артыыстар, киинэ устуутугар кыттыбыт үлэһиттэр сценаҕа тахсан хайдах устубуттарын, туох ыарахаттары көрсүбүттэрин кэпсээбиттэрэ. Улахан экраҥҥа сэтинньи ый 24 күнүгэр тахсаары турар.

***
Дана СЕМЕНОВА, 

Aartyk.Ru 

Сорох хаартыскалары Владислав КОРОТОВ тгк-каналыттан тутуннубут