СУНТААРГА ОЙУУР БАҺААРА КУТТАЛЛАННА

Сунтаар улууһугар ойуур баһаардара бэлиэтэнэн, ыксаллаах быһыы-майгы хамыыhыйата уоту умуруорууга дьаһаллары ылар. Тыал туһаайыыта уларыйа турар буолан,  Кэмпэндээйи нэһилиэгин сиригэр күөдьүйбүт уот чох хостуур карьерга кутталы үөскэтиэн сөп.

Өргөдөй, Милэки уонна Харыйалаах территорияларыгар киирэр сирдэргэ ойуур баһаардара туран, күүстээх буруо үөскээбит. Баһаардар балай да ыраах буоланнар, нэһилиэнньэлээх пууннарга уонна социальнай-экэнэмиичэскэй эбийиэктэргэ кутталы суоһаабаттар диэн айылҕа харыстабылын кэтээн көрөр салаатын үлэһиттэрэ иһитиннэрэллэр. Уот салгыы өрө барбатын диэн, билигин нэһилиэктэр чугастарын кэтииллэр.

Онтон бүтэһик туругунан, Кэмпэндээйи нэһилиэгин территориятыгар “Сооруос” диэн сылгы иитэр база аттынан саҥа ойуур баһаара бэлиэтэнэр. Тыал туһаайыыта уларыйа турар буолан, баһаар салгыы Куруҥ үрэҕинэн салаллан Хонгуруу хайатыгар чох хостуур карьерга тиийэн улахан кутталы үөскэтиэн сөп.

Улуустааҕы ыксаллаах быһыы-майгы хамыыһыйатын чилиэттэрэ, Сунтаар улууһун баһылыгын бастакы солбуйааччыта Николай Александров ыксаллаах быһыы-майгы инфраструктуратын салаата уонна айылҕа харыстабылын иниспиэксийэтэ суһал бөлөх тэрийэн, дьону түмэ тардан, уоту умуруорар тэриллэринэн уонна ону таһынан улахан тиэхиньикэнэн хааччыйан, ойуур уотун умуруоруутугар үлэ ыытыахтара.

***

«Сунтаар улууhа (оройуона)» муниципальнай оройуон дьаһалтатын пресс – сулууспата