Сунтаарга киинэ тыйаатырын үлэһиттэрэ саҥа хайысханы тобулаллар

Сунтаар улууһугар «Дархан»  киинэ тыйаатыры 2014 сыллаахха эдэр урбаанньыт Денис Павлов аспыта.

Коронавирус кэмигэр тэрилтэ үлэтэ төһө да тохтоотор, эдэр салайааччы саҥа сүүрээҥҥэ ылсар. Коронавирус дьаҥыттан сылтаан Сунтаар улууһун киинэ тыйаатыра өрөспүүбүлүкэҕэ биир бастакынан аанын саппыта.

Бу кэмҥэ мөлүйүөнүнэн сыаналаах аппаратура уһун кэмҥэ харайыллар быраабылата кэһиллэн алдьанан хаалбыт. Онон соторутааҕыта Денис Павлов Москубаттан биир мөлүйүөн сыаналаах саҥа американскай аппаратура ылан кэллэ. Улуус дьаһалтата чэпчэтиилээх кирэдьиит ыларга көмөлөстө.

Тыйаатыр салайааччыта Денис Трофимович билиҥҥи туругунан балаһыанньа уустук диир. Ол да буоллар уолаттар быар куустан баран таах олорботтор. Арааһы булан дьарыктаналлар, «дарханнар» билигин аһылык астаан тарҕаталлар.

Оттон олохтоохтор кыралыын-улаханныын киинэ көрө охсоору ыарыы халбарыйарын олус күүтэллэр.

***

Борис Николаев

Источник: ulus.media