Сунтаарга бара турар тутуулар хаамыыларын билистилэр

Ыам ыйын 20 күнүгэр, Сунтаар улууһун Аҕа баһылыга Анатолий Григорьев, тутуу комплексын управлениятын начальнига Иван Егоров улууспут киинигэр Сунтаар нэһилиэгэр бара турар тутуулар хаамыыларын билистилэр.

“РТС” түөлбэҕэ 240 миэстэлээх саҥа оҕо саадын дьиэтин тутуутугар уопсайа 28 киһи үлэлии-хамсыы сылдьар, олортон 10 атын улуустан кэлбит дьон, 18 олохтоох нэһилиэнньэ. Үлэ болдьохтоммут былаанынан баран иһэр, билигин арматуралары баайааһын үлэтигэр киирбиттэр.

“Абаҕа” түөлбэҕэ саҥа тутуллар культурнай спортивнай комплекс үлэтин көрдүлэр-иһиттилэр, онно олохтоохтортон 12 киһилээх биригээдэ үлэ ыытар. Эбийиэк акылаатыгар бетон кутуллан куурарын кэтэһэллэр.

“Бартыһаан” түөлбэтигэр хаарбах туруктаах дьиэлэртэн көһөрүү бырагыраамматын чэрчитинэн элбэх квартиралаах таас дьиэ тутуллар. Тутууга «Дабан строй» тэрилтэ үлэ ыытар, онно олохтоохтортон 20 кэриҥэ дьон үлэлиир. Үлэһиттэр билигин дьиэ муостатын өлүүтүн сабааһыныгар киирбиттэр.

Октябрьскай уулуссаҕа, көтүрүллүбүт мас дьиэ оннугар 88 квартиралаах саҥа таас дьиэ тутуута барар. Онно атын улуустартан уонна олохтоохтортон уопсайа 12 киһилээх биригээдэ үлэни ыытар. Тутуу матырыйааллара барыта кэлэн, үлэ болдьохтоммут былаанынан баран иһэр диэн иһитиннэрдилэр.

***

“Сунтаар улууhа (оройуона)” муниципальнай оройуон дьаһалтатын пресс – сулууспата