Сунтаарга Александр Атласов уонна Михаил Никифоров оробуочай сырыыннан нэһилиэктэринэн көрүстүлэр

Тыа хаһаайыстыбатынан дьарыктанар оройуоннары көрө-истэ Сунтаар улууһугар оробуочай сырыыннан СӨ Бырабыытылыстыбатын бэрэссэдээтэлин солбуйааччытын эбээһинэһин толорооччу Михаил Никифоров уонна СӨ тыатын хаһаайыстыбатын миниистирэ Александр Атласов кэллилэр.

Бүгүн, атырдьах ыйын 25 күнүгэр Куокуну нэһилиэгэр СХПК «Кириэстээх» тыа хаһаайыстыбатын производственнай кэпэрэтиибин Куокуну отделениятыгар сырдык, сылаас, аныгы кэм ирдэбилигэр толору эппиэттэһэр, тыа сиригэр тыа хаһаайыстыбата сайдыытын кэрэһэлиир 120 төбөҕө анаммыт саҥа механизированнай хотон арылынна. Үөрүүлээр тэрээһиҥҥэ Сунтаар улууһун баһылыгар кандидат Анатолий Григорьев, тыа хаһаайыстыбатын управлениетын начаалынньыга Иван Тихонов, СӨ тыатын хаһаайыстыбатын үтүөлээх үлэһитэ, айылҕа харыстабылын туйгуна, «Хотугу Сулус» уордьан кавалера Михаил Коколов, Өрөспүүбүлүкэ биллиилээх механизатора, Кыһыл Знамя уонна Ленин уордьанын кавалера, ЯАССР норуотун хаһаайыстыбатын үтүөлээх үлэһитэ Клавдий Михайлов Саҥа дьэндэйбит хотон өр кэмҥэ кэхтибэккэ турарыгар, ынах – сүөһү төрөөн–ууһаан алаас муҥунан элбээн истиннэр диэн алгыс тыл бастыҥын анаатылар.

Эдэр ыччат тыа сиригэр олохсуйан үлэлээх буоларыгар баҕа санааларын эттилэр.
Салгыы бөлөх Бордоҥ сайылыгар сылдьан «Үлэ Албан аата» уордьаннар толору кавалердара, СӨ норуот хаһаайыстыбатын үтүөлээх үлэһитэ Владимир Михайловы кытары көрүстүлэр.

Атырдьах ыйын 26 күнүгэр, оробуочай бөлөх иккис күнүгэр нэһилиэктэринэн сылдьан тэрилтэлэр тутаах салайааччыларын уонна олохтоохтору кытта көрсөн үлэлэрин-хамнастарын уонна инники былааннарын билистилэр.

Ол курдук, Сунтаар нэһилиэгэр «Үрдэл» сельскохозяйственнай потребительско снабженческо-сбытовой кооператив «Бэрэ» диэн сиргэ саҥа 100 төбө киирэр аныгы тииптээх хотон тутуутун саҕалаабыттарын көрдүлэр.

Хаһаайыстыба салайааччыта Владимир Егоров бу хотон бу сылга тутуллан үлэҕэ киирэрин кэпсээтэ.

Салҕыы бөлөх Күндэйэ нэһилиэгэр «Сырдык Аартык» тэрилтэ «Ньэккэй» сайылыгар бостууктар уонна ыанньыксыттар дьиэлэригэр сылдьан үлэһиттэрдиин көрүстүлэр. Салайааччы Розалия Иванова тэрилтэ алта сайылыктааҕын сырдатта. Былырыын сайылыктааһын бырагыраамматын граныгар кыайан саҥа титиик, үүт уурар ампаар, икки квартиралаах дьиэ тутуллубут, ону таһынан түөрт үлэһиттэр дьиэлэрин саҥардан өрөмүөннээбиттэрин билиһиннэрдэ. Нэһилиэк киинигэр саҥа тутулла турар аныгы технологияннан үүтү переработкалаан уһун болдьохтоох араас бородууксуйаны оҥорор сыаҕын көрдүлэр. Сыах оборудованиета сакаастанан турар, быйыл тутуллан үлэҕэ киирэрэ былааннанар.
Бөлөх салайааччыта СӨ Бырабыытылыстыбатын бэрэссэдээтэлин солбуйааччытын эбээһинэһин толорооччу Михаил Никифоров тыа хаһаайыстабатын сайыннарыыга бырагыраамма чэрчитинэн Сунтаар улууһугар үлэ тэтимнээхтик, былаанынан баран иһэрин тоһоҕолоон бэлиэтээтэ. Нэһилиэк баһылыктарын уонна тэрилтэ салайааччыларын, үлэһиттэрин туруорсууларын учуоттаан туран инники ыытыллар үлэни билсэн сөптөөх хардыылары ылынарга сыал-сорук туруорда.

Күүкэй нэһилиэгэр саҥа “Албан аат ыллыга” диэн нэһилиэк сайдарын туһугар үлэлээн ааспыт тумус туттар ытыктабыллаах дьон ааттарын үйэтитэр өйдөбүнньүк аллеятын үөрүүлээх арыллыыта буолла. Күүкэй нэһилиэгиттэн Саха Сирин аатырдыбыт элбэх биллиилээх дьон үүнэн-сайдан тахсыбыттара. Саҥа аллеяҕа улууска үөрэхтээһини сайыннарыыга үлэлэспит, Күүкэй нэһилиэгэр оскуола тутан киллэрбит меценат Никиты Афанасьевича Самсонов уонна СӨ Ил Дархана Айсен Николаев ыйааҕынан Күүкэйтэн төрүттээх сахалартан бастакы экономическай наука доктора, государственнай уонна общественнай деятель Егоров Егор Григорьевич сырдык аатын үйэтитэргэ анаан аллеяҕа бюстун туруордулар уонна кини аатынан «Выдающиеся люди республики» серияннан тахсыбыт кинигэ презентацияланна.

Бу үөрүүлээх тэрээһиҥҥэ Федерация Сэбиэтин чилиэнэ, сенатор Александр Акимов, СӨ Бырабыытылыстыбатын бэрэссэдээтэлин солбуйааччытын эбээһинэһин толорооччу Михаил Никифоров уонна СӨ тыатын хаһаайыстыбатын миниистирэ Александр Атласов, СӨ үөрэҕириитин миниистирин солбуйааччы Владимир Тихонов, Сунтаар улууһун баһылыгар кандидат Анатолий Григорьев, Егор Григорьевич уола Александр Егоров, Никита Афанасьевич хос сиэнэ Александр Самсонов уонна чугас аймахтара, доҕотторо, ыаллыы сытар нэһилиэктэр баһылыктара кыттыыны ыллылар.

***

“Сунтаар улууhа (оройуона)” муниципальнай оройуон дьаһалтатын пресс – сулууспата