Курс валют
$
96.91
1.15
100.68
2.25
Курс валют
Курс валют
$
96.91
1.15
100.68
2.25
Меню
Поиск по сайту

Сталинград куораты босхолооһуҥҥа

03.02.2025 (4 дня назад) 10:17 0
Сталинград куораты босхолооһуҥҥа

Кыһыл Сулус уордьан кавалера,  гвардия капитана, Саха АССР норуотун хаһаайыстыбатын үтүөлээх үлэһитэ, Сунтаар улууһун Бочуоттааҕа Мелетий Аввакумович Васильев Хаҥалас (билиҥҥитэ Кутана) нэһилиэгэр 1916 сыллаахха төрөөбүтэ.

Икки сыллаах национальнай байыаннай оскуоланы бүтэрэн баран, прокурор көмөлөһөөччүтүнэн үлэлээбитэ. 1940 с. Аармыйаҕа ыҥырыллан Забайкальскай байыаннай уокурукка сулууспалаабыта.

Мелетий Аввакумович 1942 с. Иркутскай куоракка  политсастааптар куурустарын бүтэрбитэ уонна младшай  политрук званиетын ылбыта. 252-с стрелковай дивизия  928-с стрелковай полкатыгар сэриилэспитэ. Кини полката Сталинград хайысхатын хабыр киирсиилэригэр кыттыбыта.

Мелетий Аввакумович  Сталинград куорат үлтүркэйдэригэр немецкэй аармыйа фельдмаршала Паулюһу билиэн ылыыга быһаччы кыттыыны ылбыта.  Д.Д.Избеков «Сахалар Ийэ дойду иһин кыргыһыыларга» кинигэтигэр (1966 с.) суруйбута: «…330 тыһыынча киһилээх ньиэмэс аармыйата кыайан төлө көтөн тахсыбат эргииргэ түбэспитэ. Өстөөх оборонатын Донской фронт холбоһуктара эмиэ тоҕо көппүттэрэ, онно 2 тыһыынча саха саллаата баара. Өстөөх харса суох утарсара. Гитлеровецтар охсуулаах күүстэрэ Карповка уонна Мариновка оройуоннарыгар бааллара. Ворошилов аатынан Лааҕыр диэн сэлиэнньэ иһин охсуһууга өстөөх биһиги хас да атаакабытын чугуппута. Онуоха лейтенант М.А.Васильев хамандыырдаах 638-с стрелковай полк бастакы пулеметнай ротата сэлиэнньэҕэ тоҕо көтөн киирбитэ. Хамандыыр уонна рота байыастара хорсун быһыы холобурун көрдөрөн кырыктаахтык кыргыспыттара.  Васильев бэйэтэ  өстөөх 15 саллаатын, офицерын өлөрбүтэ, 10 киһини билиэн ылбыта».

Сталинград кыргыһыытын кэнниттэн Мелетий Васильев Соҕуруулуу-Арҕааҥҥы фроҥҥа сэриилэспитэ. Хорсун быһыытын иһин Кыһыл Сулус уордьанынан, Аҕа дойду сэриитин уордьанын I истиэпэнинэн уонна мэтээллэринэн наҕараадаламмыта.

1945 с. сэтинньи 21 күнүгэр дойдутугар эргиллэн кэлбитэ. 1946-1949 сс. ССКП Сунтаар улууһунааҕы кэмитиэтин парткабинетын сэбиэдиссэйинэн үлэлээбитэ. 1949-1951 сс. Дьокуускайдааҕы партийнай оскуолаҕа үөрэммитэ. 1952-1958 сс. оройуон сэбиэтин ситэриилээх кэмитиэтин бэрэссэдээтэлин солбуйааччынан үлэлээбитэ. Оройуон бөдөҥсүйбүтүгэр 1965 с.диэри промкомбинакка плановигынан үлэлээбитэ. 1965 с. олунньутуттан 1973 с. бочуоттаах сынньалаҥҥа тахсыар диэри оройуон сэбиэтин  ситэриилээх кэмитиэтин  былаанныыр салаатыгар бэрээсэдээтэллиир.  Сынньалаҥҥа да тахсан баран Сунтаардааҕы нефтебазаҕа учуокка технигинэн, Сунтаардааҕы 23 №-дээх ОПТУ-га военругунан үлэлээбитэ.

Мелетий Аввакумович Васильев олохтон 1993 с. барбыта.

***
Сунтаар улууhун пресс-сулууспата

 

Оставить комментарий