Сайыммыт хайдах буолуой?

Хас биирдии киһини билигин кылгас сайыммыт хайдах буолара долгутар. Бэҕэһээ “Саха сирэ” хаһыат бэйэтин сайтыгар “Метео” киин салайааччыта Александр Шувалов сайыҥҥы күн-дьыл туруга хайдах буолуоҕун туһунан сабаҕалааһынын таһаарбыт. Дьэ хайдах сайыны күүтэбит?

Сайтка сурулларынан, «Метео» киин салайааччыта Александр Шувалов быйылгы сайын олус уларыйа сылдьыыһык диэн сабаҕалаабыт.  Ол эбэтэр итии-куйаас күннэри эмискэ тымныйыы солбуйуоҕа, ол быыстарыгар күүстээх ардахтар түһүөхтэрэ. Метеоролог  сайыҥҥы ыйдарга салгын температурата биллэрдик хамсыа диэн этэр эбит. Онон дьон-сэргэ күн-дьыл туруга эмискэ уларыйарыгар бэлэм буолуохтаах. Сабаҕалааһын быһыытынан, сайыҥҥы бастакы ый, бэс ыйа, саамай итии буолуоҕа, от ыйыгар күн-дьыл туруга урукку оннугар түһүөҕэ.  Синоптиктар быйылгы сайын саҕаланыыта ааспыт сылы кытта тэҥнээтэххэ сылаас буолуо диэн этэллэр. Салгын температурата биллэ үрдүүрэ күүтүллэр эрэгийиэннэр испииһэктэригэр  Саха сирэ эмиэ киирбит.  Ааспыт нэдиэлэҕэ Аммаҕа СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников илин эҥэр улуустары түмэн сааскы халааҥҥа уонна ойуур баһаардарыттан сэрэхтээх буолууга бэлэм туһунан мунньах ыыппыта. Манна Гидрометсулууспа Саха сиринээҕи управлениетын салайааччыта Людмила Мурашко илин эҥэр улуустарга быйыл сайын ааспыт сыллааҕар биир кыраадыһынан сылаас уонна сөҥүүтэ аҕыйах буолуо диэн эппитэ. “Метео” киин салайааччыта Александр Шувалов сөҥүү түһүүтэ уустук соҕус буолуоҕа диэн эмиэ эппит. Уопсайынан, сайын кураан соҕус буолар чинчилээх, ол эрээри бэс ыйыгар күүстээх быстах ардахтар түһүөхтэрин сөп диэн сэрэтэр. Ордук болҕомтону Саха сирин илин өттүгэр (илин эҥэр улуустарга) ууруохха наада — бу сирдэргэ уу тиийбэт, кураан эрэгийиэннэрин испииһэктэригэр киирдилэр. Манна ардах нуорматтан аҕыйах түһүөҕэ. Онон оҕуруот аһын олордууга, тыа хаһаайыстыбатын үлэтигэр уонна айылҕаҕа тахсан сынньанарга, ойуур баһаарын сэрэтиигэ маны булгуччу учуоттуур наада диэн “Саха сирэ” сайтыгар суруллар. Онон билиҥҥи сабаҕалааһынынан көрдөххө, кураан, сөрүүн сайыны күүтэбит курдук. Ол эрээри күн дьыл туруга күннэтэ уларыйа турар. Онон быһаччы маннык буолуо диэн этэр эмиэ уустук курдук. Көрөн иһиэхпит…

***

“Амма олоҕо” хаһыат

Хаартыска: Лариса Унарова