Саҥа төрөөбүт ньирэйгэ ринопластика эпэрээссийэтин оҥордулар

Ньурба оройуонун Бордоҥ нэһилиэгэр саҥа төрөөбүт ньирэйгэ ринопластика эпэрээссийэтин оҥордулар.

Олунньу 18 күнүгэр кэтэх хаһаайыстыбаҕа “заячья губа” ыарыылаах ньирэй төрөөбүт. Хаһаайын Маалыкайдааҕы бэтэринээринэй учаастакка биллэрбит. Ньирэй туругун көрөн баран, арыый төлөһүйэрин күүтүөххэ диэн быһаарбыттар.

8 хонон баран бэтэринээр быраас Николай Дмитриевич Максимов уопуттаах быраас Александр Прокопьевич Иванов салалтатынан ньирэйгэ эпэрээссийэ оҥордулар. 

Ньирэй сарсыныгар бэйэтэ эмэн аһаабыт, туруга этэҥҥэ. Бэтэринээр быраастар кэтээн көрүүлэригэр сылдьар.

Бу үтүө холобур ыраах сытар нэһилиэктэргэ үрдүк таһымнаах исписэлиистэр үлэлииллэрин биир бастыҥ туоһута буолар.

***
Лена Петрова, газета «Нюрба»

Хаартыскалар Бордоҥ нэһилиэгин дьаһалтатын ВК ситимиттэн