Үс Дархан ыҥырыыта

Егор БОРИСОВ, Саха Өрөспүүбүлүкэтин Ил Дархана: 

— Бу өрөбүлгэ Россия Федерациятын бэрэсидьиэнин быыбара ыытыллар. Дьылҕаны быһаарар түгэн – Крым уонна Севастополь Россия Федерациятын кытта холбоспут бырааһынньыгын күн ыытыллара бэлиэ суолталаах. Бүгүҥҥү күҥҥэ, дойдубут, куттал суох буолуутун уонна элбэх омуктаах норуотун интэриэһин, хас биирдии киһи нус-хас, ньир-бааччы олоҕо чиҥ тирэхтээхтик сайдарын, былаас уонна уопсастыба ыллыктаах сыһыаннарын үрдүктүк тутар аан дойду улуу державата буоларын өссө төгүл бигэргэттэ.

Быыбардааччылар, бу, быыбар иннинээҕи “буһуу-хатыы” күннэригэр утарыта ис хоһоонноох үгүс иһитиннэрии бөҕөнү истэн, онтон дьиҥин-чахчытын ырыҥалыырга күһэллэллэр. Үгүс дьон, ордук ыччат, бу быыбарга кимиэхэ куоластыылларын быһаарынан сылдьалларын үрдүнэн,  “эһигиттэн туох да тутулуга суох” диир санааны соҥнуу сатыыллар. Маннык сыһыан төрдүттэн сөбө суох уонна кутталлаах даҕаны. Биһиги быыбарга ээл-дээл сыһыаннаһар, саарбахтыыр, кэтэмэҕэйдиир бырааппыт суох. Хас биирдиибит политическай көрүүлэриттэн тутулуга суох өйдүөхтээх: өскөтүн кини куоластааһыҥҥа кыттыбатаҕына, кини оннугар атыттар быһаарыы ылыахтара.

Биһиги өрөспүүбүлүкэбит олохтоохторо быыбарга өрүү эппиэтинэс­тээхтик сыһыаннаһаллар. Саха сирин олохтоохторо, үгэс курдук, быыбарга көхтөөхтүк кытталлар. Ол – кинилэр дойдубут кэнэҕэс  сайдарыгар интэриэстээхтээхтэрин, гражданскай позициялара күүстээҕин уонна сарсыҥҥы күҥҥэ эрэллээхпитин бигэргэтэр.

Саха республикатын олохтоохторун, эһигини барыгытын, кулун тутар 18 күнүгэр быыбардыыр учаастактарга кэлэн, биһиги инники кэскилбитин быһаарарга бэйэҕит баҕа санааҕытын биллэрэргитигэр ыҥырабын!

Дойдубут инникитэ – биһиги илиибитигэр!

***

Вячеслав ШТЫРОВ, Федерация Сэбиэтин чилиэнэ: 

— Кулун тутар 18 күнүгэр Россия Федерациятын бэрэсидьиэнин талыахпыт. Бу дьоһун суолталаах күн – биһиги кэлэр алта сыл устатыгар Россия лидерин уонна дойдубут социальнай-экономическай сайдыытын тосхоллорун ыйар, олох таһымын тупсарыыга сүрүн боппуруостары быһаарар, аан дойду бэлиитикэтин оҥорсор киһини талабыт.

Биһиги хайдах куоластыырбытыттан дойду, өрөспүүбүлүкэ ханнык хайысханан бараллара эрэ буолбакка, хас биирдиибит олоҕун суола хайа диэки салаллара тутулуктаах. Онон, бу – сүҥкэн суолталаах быыбар. Биһиги бэйэбит дьиэ кэргэммит, тустаах үлэбит эрэ туһугар эппиэттиир буолбатахпыт, Ийэ дойдубут – Россия туһугар эппиэтинэһи эмиэ ылынабыт. Кэскилбитин бэйэбититтэн ураты ким даҕаны быһаарыа суоҕа, дьылҕабыт – бэйэбит илиибитигэр, ону бэйэбит эрэ быһаарыах тустаахпыт.

Быыбарга хас биирдии киһи куолаһа суолталаах, тоҕо диэтэххэ, дьон ордук итэҕэйэр уонна эрэнэр хандьыдаата кыайыаҕа. Бу биһиги бэйэбит талбыт лидербит буолуоҕа, итиэннэ ол быһаарыыбыт туһугар эппиэтинэһи кинини кытары тэҥҥэ сүксүөхпүт.

Ытыктабыллаах Сахам сирин олохтоохторо, 2018 сыл кулун тутар 18 күнүгэр тустаах быыбардыыр учаастактаргытыгар тиийэҥҥит, бэйэҕит гражданскай иэскитин толоруҥ диэн ыҥырабын! Биһиги бэйэбит дойдубут гражданнарабыт уонна кини кэскилин бары бииргэ сомоҕолоһон быһаарабыт.

Норуот күүһэ – көмүөл күүһэ!

***

Михаил НИКОЛАЕВ, Саха Өрөспүүбүлүкэтин бастакы бэрэсидьиэнэ: 

— Ытыктабыллаах Сахам сирин дьоно! Биһиэхэ барыбытыгар дьоһуннаах, олус улахан суолта­лаах кэм кэллэ. Дьону-сэргэни биир сыалга-сорукка түмэр сүрүн быыбар – Россия бэрэсидьиэнин талар күммүт үүнэр.

Биһиги, Саха сирин олохтоохторо, бу бэлитиичэскэй тэрээһиҥҥэ хайаан да көхтөөхтүк кыттыах тустаахпыт.  Сомоҕолоһон, дойдубут бэрэсидьиэнин таларга өрөйөн-чөрөйөн биэрэрбититтэн, аан дойду Россияҕа сыһыана олус тутулуктаныаҕа. Онон бары кэлэн куоластааҥ, бэйэбит судаарыстыбаннаспытын харыстыырбытын, сайдыыбытын туруулаһарбытын өссө биирдэ бигэргэтиэххэйиҥ!

Маннык олохпутугар сүдү суолталаах кэмҥэ ыһылларбыт, хайдыһарбыт табыллыбат! Биири тоһоҕолоон бэлиэтиэм этэ — кэхтиини кэтэһэр, куһаҕаны күөттүүр дьон тылын ылыныа суохтаахпыт.

Онон, буолаары турар быыбарга биһиги Улуу Россиябыт туһугар куоластыахха! Дойдубут социальнай-экономическай туруга бигэ тирэхтэнэн, инники диэки өссө тэтимнээхтик сайдан иһэр. Ол барыта күүстээх салайааччыттан тутулуктаах. Саха сирэ өрүү Россиялыын бииргэ буолуоҕа!

Ытыктабыллаах бар дьонум, кэскилбит туһугар, ытык иэскитин толорон, Россия бэрэсидьиэнигэр куоластыыргытыгар ыҥырабын.

Сахам дьоно, кэлэн быыбардааҥ!

***

Aartyk.Ru