Ньурбаҕа дьон дьарыктаах буоларыгар үлэ барар

Дойду үрдүнэн дьаҥ ыарыыта туран, үгүс тэрилтэлэр, дьоҕус биисинэһинэн дьарыктанааччылар үлэлэрэ сабыллар кутталланнылар. Үлэтэ суох дьон социальнай өттүнэн көмүскэллээх буолалларын туһугар Арассыыйа бэрэсидьиэнэ Владимир Путин, өрөспүүбүлүкэ Ил Дархана Айсен Николаев дьону үлэлэриттэн маассабайдык уураппат туһугар тустаах дьаһаллары таһаардылар.

Ньурба улууһун Дьарыктаах буолуу Киин салайааччыта Сахая Максимовна Столярова быйылгы үлэ туһунан билиһиннэрдэ:

– Муус устар ый туругунан 416 үлэ көрдөөччү учуокка турарыттан үлэтэ суох статустаах – 304. Босуобуйа ылааччы – 193, босуобуйа алын кээмэйэ – 2400 солк., үрдүк кээмэйэ -19 408 солк. (үрдүк кээмэйдээх босуобуйаны соторутааҕыта үлэлэриттэн уурайбыттар ылаллар). Бастакы кыбаартал түмүгүнэн Дьарыктаах буолуу киин нөҥүө 27 киһи үлэҕэ киирдэ.

Бу сылга «Үлэтэ суох гражданнары профессиональнай үөрэхтээһин» бырагырааманан 80 үлэтэ суохтары бэйэ дьыалатын тэриниэн баҕалаахтарга »Основа предпринимательской деятельности», 1С бухгалтерия, бортунуой, чааһынай охранник, машинист-кочегар, парикмахер, машинист-автогрейдэр, машинист-экскаваторщик, «С», «Д» категориялаах БелАЗ массыына суоппардар идэлэригэр куурустарга үөрэтэбит. Үлэ миэстэтин таһаарыыга тэрилтэлэр 30 үлэ вакансиятын: ветеринарнай фельдшер, инженер, ойуур харыстабылыгар инженер, экономист, буҕаалтыр, рабочай, дьиэ хомуйааччы идэлэргэ үлэлэстилэр.

Үлэтэ суох, үлэ миэстэтин булууга ыарахаттары көрсөр доруобуйаларынан хааччахтаах, элбэх оҕолоох дьиэ кэргэннэри, соҕотох кыаммат гражданнары быстах кэмҥэ үлэ миэстэтинэн хааччыйыы үлэтэ барар.
Харантыын кэмигэр үлэтэ суохтар Дьарыктаах буолуу киинигэр кэлэн үлэ миэстэтин туоһулаһаллара аны көҥүллэммэт, ол оннугар 2-31-63 телефонунан ыйыталаһыахтарын сөп. Маны таһынан, хас нэдиэлэ аайы тэрилтэлэр Дьарыктаах буолуу киин нөҥүө толору, дьиэҕэ хааччахтанан үлэлииллэрин биллэриэхтээхтэр. Бу отчуоттарын «Работа в России» порталга киирэн регистрацияланан баран көрдөрүөхтээхтэр.
Ньурбатааҕы техникум кылгас болдьоххо тутууга сыһыаннаах идэлэргэ: биир ыйдаах бетонщик, икки ыйдаах болуотунньук, биир ыйдаах штукатур, биир ыйдаах облицовщик-плиточник-1 куурустарга үөрэтэр. Дьарыктаах буолуу киин каменщик уонна штукатур идэлэргэ үлэтэ суохтары үөрэххэ суруйталыыр.

***

Ааптар: Антонина СЕМЁНОВА.