Хайдах эрэ халлаан аһара тымныйдаҕына, аһара итийдэҕинэ, ардах-хаар тохтоло суох түстэҕинэ, маны барытын Тускул аҕалбытын курдук саныы түһэбит. Итэҕэйэрдиин-итэҕэйбэттиин, кинини хайгыырдыын, мөҕүтэрдиин «Тускул бу туһунан туох диирэ буолла?» диэн буолар.
Ол эрээри бу тымныы күннэргэ норуот синоптига араадьыйаттан да, тэлэбиидэнньэттэн да, хаһыаттан да олох сүттэ. Үгүс билэр киһим бара сатаан миигиттэн кытта ыйытар буоллулар: «Тускулу өрүү сырдатар киһи, эн билэриҥ буолуо, ханна сүттэ норуот синоптига?». Бэҕэһээ бу тоҕо маннык тымныйбытын билээри күнү быһа эрийдим. Киһим олох ылбата. «Бай, туох буоллаҕай?»- диэн мин арааһы бары санаатым. Хата, бүгүн эбиэт кэнниттэн бэйэтэ эрийдэ. «Һуу, баар эбиккин дуу? Ханна сүттүҥ, өрөспүүбүлүкэ маанылаах куолаһа? Эйиигин араадьыйа истээччилэрэ сүтэрэн айманыы бөҕөлөр дии!»-, диэбиппэр, киһим: «Ээ, уоппуска ылан, икки нэдиэлэ сибээс олох мөлтөх сиригэр сайылыкпар сынньана сытабын. Бэс ыйын саҥатыгар үлэбэр тахсыам…», — диэтэ. Салгыы кэпсэтиибит маннык буолла.
— Бу тоҕо тымныйда?
— Муустаах муораттан күүстээх тымныы салгын циклона кэлэн, өрөспүүбүлүкэни барытын тымнытта. Сыыйа бэс ыйын саҥатыгар сылыйыаҕа. Урукку сылларга өрүс барыыта тымныйааччы, хаардааччы. Кэлин ону умна быһыытыйан, муус барда да, сайын кэлбит курдук саныыбыт. Тыйыс килиимэттээх сиргэ олорорбутун умнар сатаммат. Куйааран баран, эмискэ тымныйар түбэлтэ от ыйыгар эмиэ буолааччы. Бэс ыйа үүнэ да илик, тымныйымына.
— Дьон оҕуруотун олордубута быданнаата. Ол тоҥуо суоҕа дуо? Бу тымныыга сир аһын уга эмиэ үлүйбүтэ буолуо?
— Эс, хаар соторутааҕыта эрэ ууллубута дии. От-мас саҥа тыллан эрэр. Онон тоҥмот. Оттон оҕуруоттаах дьон бэйэлэрэ көрөн бүрүйэ, бүөбэйдии сырыттынар ээ. Оччотугар үүнээйилэрэ тоҕо тоҥуой, үлүйүөй?
… Дьэ, онон Тускулбут ханна да сүппэтэх, сайылыгар сынньана сытар эбит. Сайылык күнүгэр тахсан баран, икки нэдиэлэ сынньанар былааннаах. Онон тымныы кэм ааһыа, сайыммыт Тускулу кытта бэс ыйын саҥата тиийэн кэлиэҕэ. Кэтэһиэххэ!
Тускул ыам ыйа итии буолуо диэбитэ ханна баарый?!