МИРНЭЙ АРЫЫЛААҔАР НАУЧНАЙ-ПРАКТИЧЕСКАЙ КОНФЕРЕНЦИЯ БУОЛЛА

Конференция ахсынньы 14-17 күннэригэр “Новай” сопхуос базатыгар “Туймаада” Агрохолдинг тэрийиитинэн ыытылынна. Маннык конференция бу саас кулун тутар ыйыгар Дьокуускайга ыытыллан бэрт киэҥ сэҥээриини ылбыта. Бу да тэрээһин далааһынынан олус табылынна.

Манна Агрохолдинг бары хаһаайыстыбаларын салайааччылара, специалистара кэлэн сопхуоска тахсар уларыйыылары билистилэр, ону тэҥэ Москваттан, Краснодартан, Ижевскайтан, Дьокуускай куораттан специалистар, учуонайдар кыттыыны ыллылар. Конференцияҕа СӨ Бырабыыталыстыбатын бэрэссэдээтэлин солбуйааччы Михаил Никифоров, СӨ ГМ Ил Түмэн норуодунай депутата Мария Христофорова, СӨ Тыатын хаһаайыстыбатын миниистирэ Александр Атласов мунньахха кыттан тэрээһин суолтатын, кэскилин бэлиэтээн бардылар.

Тэрээһин бастакы күнүгэр хаһаайыстыбалартан, тэрилтэлэртэн кэлбит бэрэстэбиитэллэр фермаҕа сылдьан соторутааҕыта үлэҕэ киирбит Fellonаһылык тарҕатар линия хайдах үлэлиирин билистилэр. Раздатчик 32 тиийэ компонены булкуйан аһылык оҥорор кыахтаах. Барыта компьютерынан салаллар. Онон киһи сөҕөрө, ымсыыра саныыра өйдөнөр. Итини таһынан бу фермаҕа үүт ыыр аныгы оборудование туруоруллан таҥылла сылдьар. Бу сылларга фермаҕа реконструкция баран сүөһү турар саҥа площадкалара үлэҕэ киллэриллибиттэр, үүттээх боруода сүөһү аҕалыллыбыт. Биллэн турар маннык улахан тэрээһин хас да сиринэн тэҥҥэ ыытыллар буолан киһи барытыгар сылдьар кыаҕа суох. Холобурун көтөрү иитээччилэр фабрикаҕа, переработчиктар астыыр сыахха бэйэлэрин интэриэстэринэн сылдьан үлэлэрин билилистилэр.

Күн иккис аҥаарыгар сэлиэнньэ сынньалаҥын киинигэр соҕурууттан кэлбит специалистары кытары кэпсэтии буолла. Манна сүөһүнү үөскэтии технологиятын, уопсайынан сүөһүнү иитии экономикатын тупсарыы төрдүн, ынах сүөһү уонна көтөр ыарыыларын сэрэтии үлэтин ыытыы уонна эмтээһин ханнык таһымҥа билигин турарын, ньирэйи аһатыы хайдах быһыылаахтык ыытыллыахтааҕын уо.д.а. туһунан бэрт киһи болҕомтотун тардар иһитиннэрии оҥорон дьоһун кэпсэтии таҕыста.

Иккис күн фермаҕа миэстэтигэр практическай үлэ ыытыллан биһиги специалистарбыт көрөн-истэн, тутан-хабан элбэх сүбэни ылан үлэлэригэр туһаныахтара турдаҕа. Онтон салгыы специалистары кытары кэпсэтии төгүрүк остуолга  ыытылынна. Дьэ манна хайа да өттүттэн үлэлии сылдьар дьон быһыытынан өйдөһөн ирэ-хоро кэпсэтии таҕыста.

Үһүс күҥҥэ хаһаайыстыба специалистарыгар уонна үлэһиттэригэр үлэҕэ ситиһиилэрин бэлиэтээн СӨ Бырабыыталыстыбатын, Ил Түмэн, тыа хаһаайыстыбатын министиэристибэтин, “Туймаада” Агрохолдинг наҕараадаларын туттартаатылар. Онон дьэ “Туймаада” Агрохолдинг тэрийбит научнай-практическай конференцията бэрт тэрээһиннээхтик ыытыллан сыалын-соругун ситтэ. 

Тоҕо диэтэххэ бу конференция сыала агрохолдинг бары үлэһиттэрин түмэн бэйэ-бэйэлэрин үлэлэрин, ситиһиилэрин билиһиннэрии. Онтон “Новай” сопхуоска киһи көрөрө олус элбэх. Урут бу хаһаайыстыбаны Алроса хампаанньа бэйэтин кынатын анныгар көрөн олорбут буоллаҕына, кэнники сылларга “Туймаада” Агрохолдиҥҥа киирэн үлэлээн эрэр.

Билигин бу хаһаайыстыбаҕа тэрээһин, үлэни тэрийии боппуруостарыгар элбэх үлэ ыытыллар. СӨ Бырабыыталыстыбатын бэрэссэдээтэлин солбуйааччы Михаил Никифоров бу сопхуоска урукку сылларга элбэхтэ сылдьыбыт буолан кини үлэтин-хамнаһын билэр буолан тэҥнии көрөр кыахтаах, онон кини кэнники сылларга улахан уларыйыылар тахсыбыттарын тоҕоһолоон бэлиэтээтэ. 

Этиллибитин курдук хотоҥҥо реконструкция ыытыллыбыт, үрдүк кылаастаах боруода сүөһү аҕалыллыбыт, аныгы оборудованиелар туруоруллан үлэлииргэ уонна сүөһүттэн ылыллар бородууксуйаны ылыыга бары усулуобуйа оҥоһуллубут. Бу аҕыйах сыл иһигэр.

Иккиһинэн, олох хайа да эйгэтигэр сайдыы тохтообокко бара туруохтаах. Дьэ онно маннык научнай-практическай конференциялар ыытыллан дойду араас муннуктарыттан специалистар кэлэн бэйэлэрин уопуттарын, билиилэрин биэрэллэрэ хаһаайыстыбаларга саҥа санааны, сүүрээни аҕалара чуолкай.

***
Прокопий ХАБАРОВ