МЭҤЭ ХАҤАЛАСКА ААРМЫЙАҔА ЫҤЫРЫЫ ХАЙДАҔЫЙ?

Арассыыйа устуоруйатыгар призывной хамыыһыйа хааччахтаах усулуобуйаҕа түбэһэ илигэ. Сулууспаҕа ыҥырыы хайдах ааһан эрэрин, туох ыарахаттары пандемия кэмигэр көрсүбүттэрин, уолаттар сулууспаҕа бэлэмнэнэллэрин туһунан Мэҥэ Хаҥалас уонна Уус Алдан улуустарын байыаннай хамыһаара Аял Дмитриевич Петров кэпсээтэ.

Муус устар 1 күнүттэн аармыйаҕа Мэҥэ Хаҥалас уонна Уус Алдан байыаннай комиссариатыттан 70-ча эдэр киһи ыҥырыллыбыт. Ити кэмтэн эрэгийиэннэргэ анал лииньийэлэр үлэлэрин саҕалаабыттар. Арассыыйа Оборонаҕа министиэристибэтин www.mil.ru саайтыттан «Призывники» салааттан булуохха сөп.

‒ Ыам ыйын 14 күнүттэн Генштаб быһаччы лииньийэтэ үлэлиир. Сааскы ыҥырыы боппуруостарын эрийэн билсиэххитин сөп. Призывной хамыыһыйа маҥнайгытын уустук усулуобуйаны көрсөр. Байыаннай комиссариакка коронавируһу утары араас үлэлэр ыытыллаллар. Күн аайы дезинфекциялыыллар, хос аайы салгыны ыраастыыр лаампалар тураллар. Хас биирдии призывнигы, үлэһиттэри температураларын мээрэйдээн анал тэтэрээккэ бэлиэтэнэллэр.

Тэрилтэҕэ дистанцияны тутуһар разметкалар бааллар. Призывной пууннарга дезинфекция суурадаһыннара, температураны мээрэйдиир, салгыны ыраастыыр лаампалар уонна биирдиилээн киһини харыстыыр мааскалар, бэрчээккэлэр бааллар. Призывка кэлбит хас биирдии киһи, военкомат үлэһиттэрэ, мэдиссиинискэй үлэһиттэр харыстыыр быраабыланы, бары ирдэбили тутуһуохтаахтар. Онуоха инфекция тарҕамматын туһугар инструктаж ыытыллыбыта.

Призывной хамыыһыйаҕа ыҥырыллар эдэр дьон дьиэҕититтэн военкомакка кэлиэххитигэр диэри бэйэни харыстанар маасканы, бэрчээккэни кэтэргит булгуччулаах, ‒ диэн Аял Дмитриевич сэрэтэр.

***

“Эркээйи” хаһыат