Лев Павлов ситиһиилэриттэн билиһиннэрэ түстэххэ манныктар: 21 саастарыгар диэри Арассыыйаҕа бастыыр иһин чөмпүйэнээккэ иккитэ кыайан турар, Европаҕа U21 и U23 бастыыр иһин чөмпүйэнээт кыайыылааҕа, улахан дьоҥҥо Арассыыйа чөмпүйэнээтин үрүҥ көмүс призера, Аан дойдуга бастыыр иһин улахан күрэхтэһии үрүҥ көмүс мэтээлин хаһаайына.
Тустуу кириитиктэрэ, успуорт бу көрүҥүн аксакаллара сыаналыылларынан биһиги уолбут тустар истиилин Роман Дмитриев, Виктор Лебедев уонна Заурбек Сидаков курдук улахан тустууктарга майгылаталлар эбит.
Лев Павлов улахан түһүлгэлэргэ кыайыыларын төрөппүттэригэр, тириэньэрдэригэр аныыр үгэстээх. Бу сырыыга Европа киэҥ түһүлгэтигэр кыайыытын бу аҕыйах хонуктааҕыта суох буолбут көҥүл тустууга 3 төгүллээх олимпийскай чөмпүйүөн Бувайсар Сайтиевка анаата. Лев тустуу легендатын кытары биир кэмҥэ көрсөн, кини сүбэтин-аматын ылбытын олус күндүтүк саныыр.
Уолбутугар, Лев Павловка бу кыайыытынан истиҥник эҕэрдэлээн туран, инникитин да ситиһиилэр, кыайыылар кэлэ турдуннар диэн баҕа санаабытын этэбит.
***
Яина ВЛАСЬЕВА
Хаартыскалар куйаар ситимиттэн туһанылыннылар
Оставить комментарий