Кириэстээххэ олохтоох дьаһалта уонна спорт саалата саҥа дьиэҕэ үлэлэрин саҕалаатылар

Кириэстээх нэһилиэгэр уһулуччу тэрээһиннээх көхтөөх күннэр буоллулар, ол курдук  олунньу 27 күнүгэр Улуу С.А. Зверев – Кыыл Уолун 120 сылыгар анаммыт фольклорнай фестиваль көрүү күрэҕэ Кириэстээхтэн саҕаламмыта, онно эдэрдиин, кырдьаҕастыын көхтөөхтүк айар талааннарын көрдөрбүттэрэ.

Олунньу 28  күнүгэр бырааттыы Александр уонна Осип Сидоровтар ааттарынан саҥа спорт саала арылынна уонна олохтоох дьаһалта саҥа дьиэҕэ көһөн үлэтин саҕалаата.

Александр Сидоров – Европа уонна Аан дойду боруонса чемпиона, кикбоксиҥҥа международнай кылаастаах спор маастара, Осип Сидоров – СӨ физкультураҕа уонна спортка туйгуна, Кириэстээх нэһилиэгин Бочуоттаах олохтооҕо, тустууга элбэх эдэр ыччаты уһуйбут тренер.

Бүгүҥҥү спотзал үөрүүлээх аһыллыытыгар нэһилиэк тумус туттар ытык кырдьаҕаһа Михаил Коколов Аал уоту оттон алгыһын анаата. Аалай кыһыл лиэнтэни Сунтаар улууһун Аҕа баһылыга Анатолий Григорьев, Кириэстээх нэһилиэгин баһылыга Александр Григорьевтар уонна эдэр тустуук Алквиад Григорьев быстылар.

Өр кэмҥэ күүппүт сырдык, киэҥ, сылаас, эрчиллэргэ табыгастаах спорт саала киирбитинэн олохтоохтор махталларын биллэрдилэр.

***

«Сунтаар улууhа (оройуона)» муниципальнай оройуон дьаһалтатын пресс – сулууспата