Биһиги биир дойдулаахпыт, Куокуй нэһилиэгиттэн төрүттээх Святослав Эверстов «Ама мин» диэн Сиэйэ Уолун тылларыгар, Мичиллэй мелодиятыгар ырыаннан «Норуодунай биһирэбили» ылан 100 тыһ солк. наҕараадаланна.
«Тохсунньу 4 күнүгэр буолан ааспыт 2024 сылы түмүктүүр «Үрдэл» музыкальнай бириэмийэ дьоро киэһэтэ түмүктэннэ. Ол түмүгүнэн «Норуодунай биһирэбили» ыламмын үөрүүм муҥура суох. Онон күндү истээччилэрим, биир дойдулаахтарым куоластаабыккытыгар барҕа махталбын тиэрдэбин. Эһиги баар буолаҥҥыт – саха ырыата сайдар, эһиги баар буолаҥҥыт – кыайыы өрөгөйүн биллибит. Өрүүтүн ситиһиилээх, дьоллоох, күлэ-үөрэ мичээрдии сылдьыҥ» – диэн Святослав махтал тылларын тиэрдэр.
Санатан этэр буоллахпытына Кэбээйи улууһуттан үс ырыаһыт «Үрдэл-2024» музыкальнай бириэмийэҕэ кытынна. Ол курдук Куокуйтан төрүттээх Святослав Эверстов, Мукучуттан төрүттээх Константин Степанов «Дьылҕа-хаан суолунан» диэн Нохтохон тылларыгар, Инна Донская-Дайаана мелодиятыгар ырыанан. Сэбээн-Күөллэр күтүөттэрэ, Сунтаартан төрүттээх Айаал Кириллин-Күндэл «Байанай» диэн Сардаана Корякина тылларыгар, Инна Донская-Дайаана мелодиятыгар ырыанан кыттан 50 тыһ солк. наҕараадаланна.
Саха ырыатын тарҕатар, ыллыыр-туойар уолаттарбытыгар айар-тутар үлэлэригэр өссө да үрдүк ситиһиилэри, саҥа саҕахтары, чэгиэн доруобуйаны, саҥаттан саҥа кирбиилэри, дьолу-соргуну, ыра санаа туолуутун баҕарабыт.
***
Иван Софронов-Сандал
Оставить комментарий