Бүгүн, күндү ааҕааччыларбытыгар, Уаровтар аймах хайдах сынньалаҥнарын үтүө үгэскэ кубулуппуттарын туһунан кэпсиэхпит. Халыҥ аймах сайын үтүө күннэрин баттаһа Бүлүү өрүс устун сплавка устубуттара 9 сылыгар барбыт.
Бу мүччүргэннээх айаннарыгар кыра саастаах оҕолор, кийииттэр, күтүөттэр, доҕоттор эмиэ кыттыһаллар. Бу сырыыга аймахтар Бүлүү өрүстэн Ыгыатта үрэҕинэн уһуннулар. Айаннарын устата дуоһуйа сөтүөлээтилэр, балыктаатылар, аһаҕас халлаан анныгар хоннулар, бэл оннооҕор Сибиэрэп уһаайба түмэлин көрдүлэр, дойдуларын туһунан билиилэрин хаҥаттылар.
Урукку өттүгэр Уаровтар Бүлүү өрүс Бүлүүчээн өттүгэр сылдьыбыт буоллахтарына, бу сырыыга Түбэй өттүгэр уһуннулар. Ол курдук, аймахтар ыырдара кэҥээн төрөөбүт дойдуларын бүтүннүү кэрийбиттэр, сылдьыбатах сирдэрэ суоҕун кэриэтэ.
Сыллата сплавка сылдьыһыан баҕалаах аймах ахсаана элбээн иһэр. Быйылгы сплавтарыгар 7 дьиэ кэргэн уопсайа 23 буолан сырыттылар. Аймахтар бэйэлэрэ анал былаахтаахтар. Тиийбит сирдэригэр былаахтарын күөрэччи анньан иһэллэр.
Мүччүргэннээх сырыыларга турунуоххут иннинэ саамай сүрүнэ: «Күүстээх санааны ылыныы уонна сааһыланыы буолар (настрой)»,- диэн Уаровтар сүбэлииллэр.
Бу курдук түмсүүлээх Уаровтар кэлэр сплавтарын былаанныыллар. Эһиги эмиэ уһуну-киэҥи толкуйдуу барбакка көхтөөх дьиэ кэргэнтэн холобурда ылыҥ, сайыҥҥытын умнуллубаттык атаарын.
***
Мира АФАНАСЬЕВА
Оставить комментарий